Senator aýǵan soǵysy ardagerleriniń áleýmettik jaǵdaıyna qatysty usynys aıtty

ASTANA. QazAqparat – Senattyń jalpy otyrysynda depýtat Amangeldi Nuǵmanov óziniń depýtattyq saýalynda aýǵan soǵysyna qatysqan jaýyngerlerdi áleýmettik qorǵaý máselesine nazar aýdardy, dep habarlaıdy QazAqparat tilshisi.

Onyń aıtýynsha, Aýǵanstandaǵy soǵys qımyldaryna qatysqan keıbir azamattar tıisti áleýmettik qoldaý men jeńildikterdi ala almaı keledi. Aýǵan soǵysyna qatysqandar osyǵan deıin Ekinshi dúnıejúzilik soǵys ardagerlerimen teńestirilip, tıisti jeńildik alǵan edi. Alaıda, 2020 jyly jańa zańnyń qabyldanýyna baılanysty bul jeńildikter alynyp tastaldy. Soǵan oraı áleýmettik qorǵaý deńgeıi de edáýir tómendedi.

Depýtat Aýǵan soǵysyna qatysqandar alatyn memlekettik kómek deńgeıiniń tómendigin atap ótti. Qazirgi kezde beriletin 21 myń teńge adamdardyń naqty muqtajy men eldegi ekonomıkalyq jaǵdaıǵa saı kelmeıdi.

Senator buryn belgilengen jeńildikter men áleýmettik qorǵaý deńgeıin qalpyna keltirýdi, memlekettik kómekti kóterýdi jáne osy adamdardyń ómir súrý sapasyn jaqsartý úshin jaǵdaı jasaýdy usynyp otyr.

Aıta keteıik, búgin Senattyń jalpy otyrysynda depýtat Gennadıı Shıpovskıh qorǵanys ónerkásibi keshenindegi kásiporyndardy jekeshelendirý memleket úshin qaýipti saldarǵa ákelýi múmkin ekenin aıtty.

Budan bólek, senator Janna Asanova otandyq qarý-jaraq, dýlyǵa jáne qorǵanys qalqandaryn óndirýshiler óz ónimderin synaqtan ótkize almaı jatqanyn aıtty.