Senator Atyraý oblysynyń turǵyndarymen kezdesti
Senator aýyl turǵyndaryna Palata qyzmetiniń qorytyndylary týraly aıtyp, ótken sessııa barysynda qabyldanǵan zańdardaǵy negizgi jańalyqtar týraly jan-jaqty habardar etti. Ol sondaı-aq osy ýaqyt ishinde Úkimet basshysynyń atyna birneshe depýtattyq saýal joldaǵanyn atap ótti. Onyń barlyq ótinishteri Atyraý oblysynyń turǵyndary kótergen problemalyq máselelerge arnalǵan bolatyn.
Senatordyń bıylǵy mamyr aıynda óńirge sapary barysynda Qyzylúı jáne Jasqaırat aýyldarynyń turǵyndary gaz qubyryn tartý máselelerin aıtqan edi. Ǵumar Dúısembaev osy máseleni sheshýge atsalysqanyn atap ótti. Sonyń nátıjesinde qazirgi kezde qajetti qarjy bólinip, tıisti rásimder ótkizildi. Júzdesý kezinde memlekettik menshiktegi Naryn sý arnasyn kúrdeli jóndeý máselesi de talqylandy. Bul sý arnasy 4 eldi meken turǵyndarynyń maly jaıylatyn jaıylym alqabyn sýmen qamtamasyz etedi.
Qurmanǵazy aýdanynyń Asan, Azǵyr, Balqudyq jáne Súıindik aýyldarynda memlekettik shekaradan jeńildetilgen tártippen ótý sharttaryn jaqsartýǵa qatysty suraqtar senatorǵa kóbirek qoıyldy. Qazir óńir turǵyndary shekarany shekteýli ýaqytta tek jeke avtokólikpen jáne 30 kılogramm júkpen ǵana kesip óte alady. Senator bul másele Qazaqstan men Reseıdiń Syrtqy ister mınıstrlikteri deńgeıinde ǵana emes, eki eldiń Úkimet basshylary tarapynan da qaralyp jatqanyn atap ótti. Ǵumar Dúısembaev sondaı-aq bul másele Qazaqstan Parlamenti Senatynyń jáne Reseı Federatsııasy Keńesi Federaldyq Jınalysynyń tóraǵalary men depýtattarynyń kezdesýleri kezinde de kóterilgenin eske saldy.
Aýyl turǵyndary kótergen taǵy bir másele – joldardyń sapasyna qatysty boldy. Senator máseleni jergilikti jerde zerdeleý úshin jol mamandarymen, merdiger uıymdardyń ókilderimen birqatar kezdesýler ótkizip, «Atyraý-Astrahan» avtomobıl jolynyń qurylys barysymen tanysty. Depýtat júrgizilip jatqan jumystardyń sapasy joǵary bolýy mańyzdy ekenine merdiger uıymdardyń nazaryn aýdardy.
Senatordyń aýyl turǵyndarymen, qoǵamdyq uıymdardyń ókilderimen, sondaı-aq aýdandar men oblys basshylyǵymen barlyq kezdesýleri barysynda Ǵumar Dúısembaev Senattaǵy jáne tıisti sala mamandary atqarǵan jumystary týraly egjeı-tegjeıli habardar etti.
