Senator Atyraý oblysynda Úkimet deńgeıinde sheshýdi talap etetin máselelerdi atady
Onyń sózine qaraǵanda, «Respýblıkalyq jáne oblystyq bıýdjetter, respýblıkalyq mańyzy bar qalalar, astana bıýdjetteri arasyndaǵy 2020-2022 jyldarǵa arnalǵan jalpy sıpattaǵy transfertterdiń kólemi týraly» Zańǵa sáıkes, Atyraý oblysy «donor» bolyp sanalady. Bul turǵyda respýblıkalyq bıýdjetke 642 mlrd teńgeni, onyń ishinde 2021 jylǵa - 213,7 mlrd teńgeni aýdarýy kerek.
«Oblystyq bıýdjetten joǵaryda kórsetilgen bıýdjettik alymdardyń kólemi kezinde 2021 jyly respýblıkalyq bıýdjetten Atyraý oblysyna beriletin nysanaly transfertterdiń kólemi 56,9 mlrd teńgeni quraıdy. Al basqa donor óńirler boıynsha múldem basqa kórinis qalyptasýda», - dedi senator.
Onyń aıtýynsha, óńirdiń áleýmettik jáne ınfraqurylymyn damytý boıynsha QR Úkimeti deńgeıinde sheshýdi talap etetin birqatar máseleler bar. Búgingi kúni 2018-2019 jyldary bastalǵan bıýdjettik ınvestıtsııalyq jobalardy oblys boıynsha tolyq aıaqtaý úshin 76,3 mlrd teńge qajet bolyp otyr, al jergilikti bıýdjettiń damý bóligindegi múmkindigi shamamen 30 mlrd teńgeni quraıdy.
«Budan basqa, 153 aýyldyq eldi mekenniń 12-si áli kúnge deıin ortalyqtandyrylǵan aýyz sýmen qamtamasyz etilmegen jáne 18 eldi mekenge aýyz sýdy arnaıy jetkizý uıymdastyrylǵan. Óńir respýblıkada alǵashqy bolyp gazdandyrýdy bastaǵanyna qaramastan, áli kúnge deıin 18 aýyldyq eldi meken tabıǵı gazben qamtamasyz etilmegen. Bıyldyń basynda oblys boıynsha apatty jaǵdaıdaǵy 79 turǵyn úı tirkelgen. Apatty jaǵdaıda - 4, úsh aýysymdy 11 mektep bar», - dedi depýtat.
«Joǵaryda baıandalǵannyń negizinde jáne búgingi tańda óńirdegi problemalardy eskere otyryp, respýblıkalyq bıýdjettiń negizgi donory retinde Atyraý oblysy damý bıýdjetiniń mólsherin ulǵaıtý bóliginde jalpy sıpattaǵy transfertterdi esepteý ádistemesin qaıta qaraýdy, al 2021-2023 jyldar bıýdjetinde respýblıkalyq bıýdjetten ony naqtylaý jáne túzetý kezinde transfertterdi ulǵaıtýdy suraımyz», - dedi Ǵumar Dúısembaev.
