Senator Atyraý oblysynda múgedek balalarǵa ońaltý ortalyǵyn salýǵa shaqyrdy
Ǵ.Dúısembaev Jylyoı aýdanyndaǵy Qulsary qalasynyń ınjenerlik jáne áleýmettik ınfraqurylymdardyń jaı-kúıi óte nashar ekenin atap ótti. Atap aıtqanda, sý qubyry, káriz, jylý jáne elektr jelileri tolyǵymen tozǵan, salynǵan sátten bastap olarǵa kúrdeli jóndeý júrgizilgen joq.
Senatordyń pikirinshe, óńirdegi jol problemalaryn sheshý de erekshe nazar aýdarýdy talap etedi.
«Qulsary qalasyna avtokólik joldaryna qaıta jańǵyrtý jumystaryn qarqyndy júrgizý kerek. Qazirgi kezde avtomobıl joly máselesi turǵyndar arasynda jıi kóterilip otyr. Búgingi tańda qaladaǵy 416 shaqyrym kósheniń tek qana 52,6 paıyzy avtomobıl jolymen qamtamasyz etilgen. Joldyń qalǵan bóligi asfalt tóseýdi, órkenıetti jol salýdy talap etedi», - dedi Ǵumar Dúısembaev.
Senator salyq statıstıkasy týraly aıtty, oǵan sáıkes Jylyoı aýdanynan respýblıkalyq bıýdjet pen Ulttyq qorǵa 2021 jyly shamamen 1,7 trln teńge tústi. Ol bul qarajattyń bir bóligin jergilikti ózin-ózi basqarýdy jetildirý jáne tórtinshi deńgeıdegi bıýdjetti damytý úshin jergilikti ózekti máselelerdi sheshýge baǵyttaý mańyzdy dep sanaıdy.
Senator Jylyoı aýdanynyń ortalyǵy Qulsary qalasynda múgedek balalarǵa arnalǵan ońaltý ortalyǵyn salý qajettigine erekshe toqtaldy. Ol otbasynda qosymsha kútimdi qajet etetin múmkindigi shekteýli balalary bar óńir turǵyndary osyndaı ótinish aıtqanyn atap ótti.
«Oblysta múmkindigi shekteýli osyndaı balalardy emdeıtin arnaıy mamandar jetispeıdi. Sondyqtan ata-analar birlesip qarjy jınap, iri qalalardaǵy ońaltý ortalyqtarynan logoped, defektolog, dene shynyqtyrý mamandaryn shaqyryp, emdik sharalardy uıymdastyrýǵa májbúr bolyp otyr. Osy jaǵdaıdy eskere otyryp, Atyraý oblysyndaǵy Qulsary qalasynda múmkindigi shekteýli balalarǵa arnalǵan qazirgi zamanǵy jabdyqtar men emdeý basseıni bar jáne mamandarmen tolyq qamtylǵan ońaltý ortalyǵyn saldyrýdy suraımyn», - dedi senator.
