Senator Astanadaǵy meıramhanalardy qala shetine shyǵarýdy usyndy
ASTANA. QazAqparat - Senator Serik Aqylbaı Astanadaǵy kólik keptelisi problemasyn sheshý úshin meıramhanalardy qalanyń shetine shyǵarýdy usyndy. Ol Senattaǵy parlamenttik tyńdaýda osyndaı pikir bildirdi, dep habarlaıdy QazAqparat.
«Birneshe aı buryn Germanııada, ıaǵnı Mıýnhende boldym. Bul qalanyń ortalyǵynda meıramhanalar óte az, olar negizinen qalaǵa kireberiste ornalasqan. Al bizde ákimshilik ǵımarattar men meıramhanalar shahardyń ortalyǵynda jaıǵasqan. Osy oraıda barlyǵy ortalyqqa qaraı aǵylady. Germanııadaǵy áriptesterden meıramhanalar ne úshin qalanyń shetinde ornalasqanyn suradym. Olar óz kezeginde qalanyń ishinde kólik sanyn azaıtý turǵysynda tıisti sharalar qabyldanǵanyn aıtty. Meıramhanalar qalanyń syrtyna qaraı ornalasqan kezde qalanyń kólik júıesine júkteme teńdestirilgen túrde bolady. Bul turǵyda bizge de tıisti zertteýler jasaǵan jón»,-dedi senator.
Óz kezeginde Astana qalasy ákiminiń birinshi orynbasary Sergeı Horoshýn uzaq merzimdi bolashaqta elordadaǵy kólik keptelisi problemasyn sheshýge birneshe ortalyqtardyń qurylýy yqpal etetinin atap ótti.
«Búginde bizde eki ǵana ortalyq bar, ıaǵnı qalalyq ákimdik ornalasqan eski bólik pen Sol jaǵalaý. Qazirgi kezde tıisti baǵdarlama ázirlendi, onda jobalanǵan jeti aýdan qarastyrylyp otyr. Onyń árqaısysynda óz ortalyǵy qurylady»,-dedi Horoshýn.
Al qysqa merzimdi perspektıvada qala kóshelerindegi kólik keptelisteri jol aıyryqtary men qala turǵyndarynyń jumys kestesin ózgertý arqyly sheshilmek.
