Senator Astana medıtsınalyq ýnıversıtetine ulttyq mártebe berýdi usyndy
ASTANA. KAZINFORM – Senator Nurtóre Júsip óziniń depýtattyq saýalynda medıtsınalyq negizgi joǵary oqý oryndaryn odan ári damytý qajettigi týraly aıtty.
Senatordyń sózine qaraǵanda, Memleket basshysynyń tapsyrmalary aıasynda elimizde medıtsınalyq kómektiń sapasyn arttyrý jáne bilikti kadrlardy daıarlaý maqsatynda densaýlyq saqtaý salasynda júıeli reformalar iske asyp jatyr.
Depýtat tarıhy baı ári halyqaralyq deńgeıde tanymal Astana medıtsınalyq ýnıversıteti maman daıarlaý jáne salany damytýda mańyzy zor ekenin atap ótti. Demek, onyń áleýetin odan ári nyǵaıtýdy ýaqytyń ózi talap etip otyr.
- Ýnıversıtet bakalavrıattan bastap rezıdentýra, magıstratýra jáne PhD doktorantýraǵa deıingi barlyq deńgeıde 80-nen astam bilim berý baǵdarlamasyn iske asyrady. Ýnıversıtette 11 myńnan astam bilim alýshy, onyń ishinde 20 elden 700-den astam sheteldik stýdent oqıdy. Sońǵy 3 jylda memlekettik bilim berý tapsyrysy boıynsha túlekterdiń jumysqa ornalasý deńgeıi 99%-dy qurady. Ýnıversıtettiń strategııalyq baǵyty – profılaktıkalyq medıtsına jáne halyq densaýlyǵyn saqtaý. Bul baǵyt otandyq densaýlyq saqtaý mektebiniń negizin qalaýshylardyń biri, memleket jáne qoǵam qaıratkeri Tóregeldi Sharmanulynyń ǵylymı murasymen tolyq úılesedi, - dedi Nurtóre Júsip Úkimet basshysynyń atyna joldaǵan saýalynda.
Senator osyǵan baılanysty Astana medıtsına ýnıversıtetine «Ulttyq ýnıversıtet» mártebesin berý múmkindigin qarastyrýdy, sondaı-aq joǵary oqý ornyna akademık Tóregeldi Sharmanovtyń esimin berýdi usyndy. Ol sonymen qatar osy bastamalardy iske asyrý úshin quqyqtyq jáne uıymdastyrý tetikterin pysyqtaý qajettigin atap ótti.
Eske salaıyq, 2024 jyly 25 mamyrda medıtsına ǵylymdarynyń doktory, professor, gıgıenıst-nýtrıtsıolog ǵalym, Qazaqstannyń eńbek sińirgen qaıratkeri, akademık Tóregeldi Sharmanov 94 jasqa qaraǵan shaǵynda ómirden ótti.