Senator «Astana.KZ» qurama komandasyna qarjy bólýdi surap otyr
ASTANA. 5 sáýir. QazAqparat - Búgin QR Parlamenti Senatynyń jalpy otyrysynda senator Tólegen Muhamedjanov Úkimet basshysynyń atyna saýal joldady.
Onda depýtat Premerden «Astana.KZ» Ulttyq KVN qurama komandasyna» qarjylaı qoldaý kórsetýdi surady.
«Bul depýtattyq saýaldy joldaýyma «Astana.KZ» Ulttyq KVN qurama komandasy» Qoǵamdyq birlestigi ujymynyń ótinishi sebep bolyp otyr. KVN-niń álemniń otyzdan astam memleketterinde tanymal qoǵamdyq-mádenı qozǵalysqa aınalǵandyǵy málim. Qazaqstan Respýblıkasy KVN komandasynyń Halyqaralyq KVN odaǵynda alatyn orny bólek», - deıdi senator.
Onyń aıtýynsha, qurama komanda Birinshi arnada kórsetiletin Halyqaralyq KVN odaǵy chempıonatyna osymen on ekinshi ret qatysyp otyr. Osy arqyly qazaqstandyq jas býyn álemdik deńgeıdegi Qazaqstan Respýblıkasynyń bedeliniń artýyna, ári elordamyz Astanany dáripteýge oń yqpalyn tıgizedi.
«2012 jyly Halyqaralyq KVN odaǵynyń joǵary lıga chempıonatynda elimizdiń namysyn Qazaqstan Respýblıkasy KVN qurama komandasy qorǵaıtyn bolady. Chempıonattyń 1/8 fınalynda jeńgen komanda 2012 jyly 24 sáýir kúni Máskeý qalasynda ótetin saıystyń kelesi aınalymyna joldama aldy. Sondyqtan Qazaqstan Respýblıkasy KVN qurama komandasyna qoldaý kórsetýińizdi jáne onyń Halyqaralyq KVN odaǵy joǵarǵy lıga chempıonatynyń 1/4 fınalyna qatysýyn qarjylandyrý máselesin qarastyrýyńyzdy suraımyn», - deıdi depýtat.
