Senator áskerı kafedralar týraly: áskerılerdi daıyndaýda jańa tásil kerek
ASTANA. KAZINFORM — Senator Andreı Lýkın Qazaqstandaǵy áskerı daıyndyq qurylymy men ádisteri qazirgi zamannyń qaýip-qateri men elimizdiń suranysyna sáıkes kelmeıtinin aıtty.
Depýtattyń sózine qaraǵanda, qazirgi kezde Qazaqstanda 41 áskerı kafedra jumys istep tur. Olarda jyl saıyn 21 myńnan astam stýdent 85 áskerı-eseptik mamandyq boıynsha bilim alady.
Olardyń tek az ǵana bóligi kıberqaýipsizdik, geoaqparattyq júıeler jáne avtomattandyrylǵan basqarý júıeleri sııaqty asa mańyzdy jáne tapshy mamandyqty meńgeredi.
- Búgingi kúni azamattyq joǵary oqý oryndarynyń rektorlary áskerı kafedralarda áskerı daıyndyqtan ótken rezervti daıyndaý úshin zapastaǵy jáne otstavkadaǵy ofıtserlerdi jumysqa qabyldaıdy. Mundaı tásil tıisti áskerı mekemeden tys sheshim qabyldaýǵa alyp kelýi múmkin. Bul turǵyda oqytýshylarǵa qoıylatyn kásibı talaptardy baqylaý shektelýi yqtımal. Sonymen qatar, onda naqty áskerı bilim berý talabyna emes, ákimshilik nemese ekonomıkalyq múddege basymdyq berilýi múmkin, – dedi senator Lýkın Úkimet basshysy Oljas Bektenovtiń atyna joldaǵan saýalynda.
Senator qazaqstandyq stýdentter sheteldik azamattyq joǵary oqý oryndarynda bilim alyp júrip, «sol elderdiń áskerı kafedralarynda daıyndyqtan ótý múmkindiginen aıyrylǵanyn» atap ótti. Bul olardyń halyqaralyq áskerı qaýymdastyqqa kirigýine jáne tájirıbe almasýyna kedergi keltiredi.
A. Lýkın osy máselelerdi sheshý úshin qyzmet etýshi ofıtserlerdi áskerı kafedralarda mindetti túrde rotatsııalaý talaptaryn engizýdi jáne oqytýshylardy júıeli túrde attestatsııadan ótkizý júıesin engizýdi usyndy.
- Oqytýshylardyń quzyreti olardyń mamandyqtaryna sáıkes bolýy zańmen bekitilýi tıis. Qazirgi zamanǵy qaýip-qaterge beıimdelgen naqty baǵyttaǵy bilim berý baǵdarlamalaryn engizý qajet. Sonymen qatar, sheteldik azamattyq joǵary oqý oryndarynda oqıtyn qazaqstandyq stýdentterdiń sol elderdegi áskerı kafedralarda daıyndyqtan ótýine múmkindik beretin tıisti kelisim jasaýdy qarastyrý kerek, – dedi depýtat.