Senator Arys týraly: Jýrnalıster shynaıy aqparat taratyńyzdar

TÚRKІSTAN. QazAqparat - Arystaǵy jaı-kúımen tanysý úshin bir top senatorlar keldi, dep habarlaıdy QazAqparat ákimdiktiń baspasóz qyzmetine silteme jasap.

Arystyqtardyń jaı-kúıimen tanysý úshin QR Parlamenti Senatynyń Halyqaralyq qatynastar, qorǵanys jáne qaýipsizdik komıtetiniń tóraǵasy Muhtar Qul-Muhammed jáne Qarjy jáne bıýdjet komıtetiniń múshesi Álı Bektaev, Qazaqstan Respýblıkasy Parlamenti Senatynyń Ekonomıkalyq saıasat, ınnovatsııalyq damý jáne kásipkerlik komıtetiniń tóraǵasy Asqar Beısenbaev, Ekonomıkalyq saıasat, ınnovatsııalyq damý jáne kásipkerlik turaqty komıtetiniń múshesi Álimjan Qurtaev Túrkistan oblysyna arnaıy keldi.

Ordabasy aýdany, Aqjol aýyly, Jambyl atyndaǵy orta mektepte ornalasqan arnaıy shtab jumysymen jiti tanysqan senatorlar tótenshe jaǵdaı boıynsha tynbaı jumys atqaryp júrgen azamattarǵa joǵary baǵa berdi.

«Jarylys bolǵan sátten jedel jumys atqarǵan shtab jumysyn joǵary baǵalaımyn. Óıtkeni, eń basynda naqty sheshim qabyldanbaı, jumys júıeli júrmese, apat saldary budan da aýyr bolatyn edi. Arystaǵy jaǵdaı áli de qazaq halqynyń bereke-birliginiń baryn kórsetti. Qazirgi kezde halyqty úreılendiretin, jalǵan aqparat kóp taraýda. Osy oraıda, barshaǵa, jýrnalıster qaýymyna shynaıy aqparat taratyńyzdar degen tilek aıtqym keledi», - dedi M. Qul-Muhammed.

Arystaǵy apat barlyq qazaqstandyqtardy beı-jaı qaldyrmady degen Asqar Beısenbaev qaıtys bolǵan azamattardyń otbasyna, aǵaıyndaryna kóńil aıtyp, shtab jumysynyń júıeli júrgizilip jatqanyn atap ótti.

Jambyl atyndaǵy mekteptegi shtabtan soń senatorlar Arys qalasynda oryn tepken ekinshi shtab jumysymen tanysýǵa bet aldy.