Senator ardagerler týraly zań nelikten mańyzdy ekenin túsindirdi

NUR-SULTAN. QazAqparat – Parlament Senatynyń depýtaty Baqytjan Jumaǵulov Memleket basshysy qol qoıǵan «Ardagerler týraly» Zańǵa qatysty pikir bildirdi, dep habarlaıdy QazAqparat tilshisi.

«Mańyzdy zań qabyldandy dep oılaımyn. Prezıdent Qasym-Jomart Toqaev «Ardagerler uıymy» respýblıkalyq qoǵamdyq birlestigi ortalyq qeńesiniń tóraǵasy Baqtyqoja Іzmuhambetovty qabyldaǵan kezde, ardagerler týraly zańdy qabyldaýdy jyldamdatý máselesine nazar aýdardy. Buǵan deıin osyndaı júıeli qujat bizde bolmaǵan. Bizde ardagerlerdiń áleýmettik jaǵynan qorǵalýyna únemi nazar aýdarylyp keldi, alaıda ardagerler týraly biryńǵaı zań bolmaǵan edi. Bul óz kezeginde elimizdiń ardagerleri týraly júıelengen, keshendi jeke zań», - dedi B. Jumaǵulov.

Depýtattyń paıymynsha, ózge zańdardaǵy ardagerlerdi qoldaý qadamdary osy qujatta saqtalýy óte mańyzdy.

«Eń bastysy, memleket ardagerlerdi áleýmettik qoldaý kepildigine ekpin qoıyp otyr. Bul óz kezeginde saıası ári áleýmettik turǵydan óte mańyzdy. Sondyqtan zańnyń Jeńistiń 75 jyldyǵy qarsańynda qabyldanýy sımvoldyq mánge ıe dep sanaımyn», - dedi senator.

«Bizdiń ákelerimiz soǵystyń qıyndyqtaryn bastan ótkerdi. El Prezıdenti osyǵan deıin soǵysta bolǵan ákesi jaıynda estelikter aıtqan bolatyn. Bul soǵystyń qıyndyqtaryn árbir otbasy sezindi. Atap aıtqanda, «Ardagerler týraly» Zańnyń Jeńis kúni qarsańynda qabyldanýy barshamyzdy qýantty», - dedi B. Jumaǵulov.

Aıta keteıik, Memleket basshysy «Ardagerler týraly» Qazaqstan Respýblıkasynyń Zańyna qol qoıǵan bolatyn.

Budan buryn habarlanǵandaı, 30 sáýir kúni Parlament Senatynyń jalpy otyrysynda «Ardagerler týraly» Zań qabyldandy.

Zań jobasynyń negizgi maqsaty – ardagerlerdi áleýmettik qorǵaýǵa baılanysty qoǵamdyq qatynastardy retteıtin zańnamalyq aktilerdi júıeleý, qaıta qaraý jáne ardagerlerdiń jańa sanattaryn qalyptastyrý.

Sonymen qatar, jalpy otyrysta «Qazaqstan Respýblıkasynyń keıbir zańnamalyq aktilerine áleýmettik qamsyzdandyrý máseleleri boıynsha ózgerister men tolyqtyrýlar engizý týraly» ilespe Zań eki oqylymda qaralyp, qabyldandy.

Ony ázirleý qajettiligi birqatar zańnamalyq aktilerdi «Ardagerler týraly» zań jobasyna sáıkes keltirýmen baılanysty. Negizgi jańa ózgerister áleýmettik tólemderge qatysty bolyp otyr.