Senator ár mekteptiń tórine Ahmet Baıtursynulynyń portretin ilip qoıýdy usyndy
Mundaı bastamany ol L.N.Gýmılev atyndaǵy Eýrazııa ulttyq ýnıversıtetinde ótken «Ahmet Baıtursynulynyń ǵylymı murasy jáne Jańa Qazaqstannyń zııatkerlik sabaqtastyǵy» atty halyqaralyq ǵylymı-praktıkalyq konferentsııada kóterdi.
«Ahmet Baıtursynulynyń osydan týra bir ǵasyr buryn alǵashqy Oqý-aǵartý mınıstri bola júrip aıtqan mynadaı salıqaly sózi bar. «Mekteptiń jany – muǵalim», - deıdi. Endeshe osyndaı marǵasqa muǵalimniń portretin Qazaqstannyń árbir mektebinde, osy sózdermen birge nege ilip qoımasqa? Bul usynysty sizderdiń qoldaýlaryńyzben búgingi Oqý-aǵartý mınıstri Ashat Aımaǵambetovke jetkizýge ýáde beremin», - dedi depýtat.
Konferentsııadan keıin ǵalym QazAqparat tilshisine bul usynysynyń mánin túsindirdi.
«Mektepke keıingi 20 jylda saıasat kirip ketken kezder boldy. Olaı bolmaýy kerek. Bilim oshaqtarynyń tórinde ultty aǵartý jolynda janyn pıda etken Ahmet Baıtursynulynyń sýreti tursa oryndy. Qazaqstanda 7 myńǵa jýyq memlekettik mektep bar desek, sonyń árqaısysynda Ahmet Baıtursynulynyń portreti men qanatty sózi ilinýi kerek. Bul usynysty konferentsııaǵa qatysýshylar qoldaǵanyn ózderińiz kórdińizder. Mınıstrge eldiń tilegin jetkizemin», - dedi Altynbek Nuhuly.
Sondaı-aq, ol konferentsııaǵa qatysyp otyrǵan Mádenıet jáne sport mınıstri Dáýren Abaevqa astana tórinen boı kóteretin Ahmet Baıtursynulynyń eskertkishin eńseli etip ornatýǵa kúsh salsańyz degen usynys aıtty.
«Quramynda birneshe depýtat pen elge belgili tulǵalar bar Ahań atyndaǵy qoǵamdyq qor qurǵan bolatynbyz. Sol kisilerdiń ótinishin osy múmkindikti paıdalanyp aıtyp óteıin. Elorda tórinde ashylatyn Ahmet Baıtursynuly eskertkishi eńseli ári záýlim bolýy kerek. Mundaı eskertkishti qazaq ǵylymynyń atasy, alǵashqy akademık Qanysh Sátbaevqa ashqanymyzdy bárińiz bilesizder. Endi ǵylymnyń negizi, bilimniń atasy Ahańnyń eskertkishi de osyndaı záýlim bolsa eken dep tileımiz. Dáýren Áskerbekuly (Mádenıet jáne sport mınıstri Dáýren Abaev - avt.) osy eskertkishtiń sońǵy núktesin, sheshimin shyǵaratyn – sizdiń mınıstrlik. Bul halyqtyń ótinishi. Kishkentaı ǵana eskertkish bolmasyn. Biz Ahmet Baıtursynuly kóshesimen arnaıy júrip óttik. Úsh orynnyń ishinde eń yńǵaılysy jańadan ashylǵan Qazaq drama teatrynyń qasynan salynyp jatqan úlken alleıanyń boıynda bolsa degen úmitimiz bar. Sony eskerseńizder», - dedi senator.
Aıta keteıik, búgin Ahmet Baıtursynulynyń týǵanyna týra 150 jyl toldy.
