Senator Andreı Lýkın: Senat azamattardyń ómir súrý sapasyn jaqsartýdy kózdeıdi
ASTANA. KAZINFORM – Parlament Senatynyń depýtaty Andreı Lýkın Astana qalasy «Almaty» aýdanynyń turǵyndarymen kezdesti. Onda aýdandaǵy ózekti áleýmettik máseleler keńinen talqylandy.
Kezdesýde kóterilgen basty túıtkilderdiń biri jańa bilim berý jáne medıtsınalyq mekemelerdiń qurylysyna qatysty boldy. Turǵyndar halyq sanynyń kóbeıip kele jatqanyna nazar aýdaryp, osyǵan baılanysty týyndaıtyn qajettilikterdi qamtamasyz etý úshin qosymsha mektep, emhana jáne balabaqshalar salý kerek ekenin aıtty. Mádenı demalys máselesi de áńgimege arqaý boldy. Azamattar aýdannyń mádenı ómirine tyń serpin beretin is-sharalar men shyǵarmashylyq jobalar kóbirek uıymdastyrylǵanyn qalaıtyndaryn jetkizdi.
Senator barlyq másele nazardan tys qalmaıtynyn aıtyp, Palatanyń zań shyǵarý qyzmetine de toqtalyp ótti.
«Senat qyzmeti azamattardyń ómir súrý sapasyn jaqsartýdy jáne qoǵamnyń jan-jaqty damýyna qajetti jaǵdaı jasaýdy kózdeıdi. Biz ómirdiń barlyq salasyn, onyń ishinde bilim berý, densaýlyq saqtaý jáne mádenıetti damytýǵa yqpal etetin zańdardy qabyldap, jetildirý boıynsha belsendi jumys istep kelemiz. Basty maqsatymyz – jastarǵa sapaly bilim berýdi qamtamasyz etý, azamattarǵa joǵary deńgeıdegi medıtsınalyq qyzmet kórsetýge qol jetkizý jáne mádenı murany damytyp, shyǵarmashylyqty qoldaý», - dedi Andreı Lýkın.
Sonymen qatar depýtat «OzgeEpic» alǵashqy iri kreatıvti habtyń ashylý rásimine qatysty.
Atalǵan hab básekege qabiletti zamanaýı ónerdi damytý, qoǵamnyń mádenı sanasyna serpin berý, sondaı-aq daryndy jáne zııatker jastardy qoldap, olarǵa tálimgerlik kórsetý maqsatymen qurylyp otyr.
