Senator Almaty metrosynyń poıyzdaryn jańartýdy usyndy
ASTANA. KAZINFORM – Asa mańyzdy ınfraqurylymda búginde birqatar másele qordalanyp qalǵan. Bul jóninde QR Parlamenti Senatynyń depýtaty Ǵalıasqar Sarybaev Senattyń jalpy otyrysynda Premer-mınıstr Oljas Bektenovke joldaǵan depýtattyq saýalynda málimdedi.
– Kólik-logıstıka salasynda nazardan tys qalatyn mańyzdy baǵyt – elimizdegi jalǵyz Almaty metropolıteni. Búginde ol 11 beketti qamtıdy. Bolashaqta jelini odan ári damytý josparda bar. Qalqaman beketiniń qurylysyn aıaqtaý, «Barlyq» bazaryna qaraı uzartý kózdelgen, – dedi ol.
Metrony jyl saıyn 26 mıllıonnan astam jolaýshy, táýligine 120 myńnan asa adam paıdalanady. Bul kórsetkish turaqty túrde ósip kele jatyr.
– Bul jeli is júzinde kóshege túsetin júktemeni azaıtyp, turaqty qalalyq mobıldikti qamtamasyz etetin, ekologııalyq jaǵdaıǵa oń áser beretin bazalyq kólik túrine aınaldy, – dedi senator.
Onyń sózinshe, osyndaı mańyzdy transportta keıde tehnıkalyq aqaý bilinedi. Máselen, ótken aptada jyljymaly quramnyń tútindeý faktisi tirkelgen.
– Atalmysh jaǵdaıdyń der kezinde turaqtandyrylǵanyna qaramastan, bul salada ártúrli táýekelder bar jáne ol memlekettik deńgeıde tıisti sharalar qabyldaýdy talap etedi, – dedi depýtat.
Ǵalıasqar Sarybaev máseleniń naqty sheshý joldaryn usyndy.
– Almaty metropolıteniniń jyljymaly quramyn jańartýǵa baılanysty qaýipsizdik, tehnologııalyq úılesimdilik jáne júıeniń turaqty jumys isteýi máseleleri boıynsha táýekelderdiń aldyn-alý maqsatynda keshendi baǵalaý júrgizýge, oryn alǵan jyljymaly quramnyń tehnıkalyq aqaýynyń jaı-kúıin jan-jaqty zerdeleýge; ártúrli óndirýshilerden tehnıkalar men tehnologııalardy satyp alý kezinde qoldanystaǵy jáne jetkiziletin taýarlardyń sáıkestigi men sapasyn qatań qaraýǵa; jolaýshylar aǵynynyń ósýi jáne jeli joldarynyń keńeıýi jaǵdaıynda metropolıtenniń úzdiksiz ári qaýipsiz jumys isteýin qamtamasyz etýge baǵyttalǵan uzaq merzimdi strategııalyq jospar ázirleýge tapsyrma berýińizdi suraımyz, – dedi depýtat.
Aıta keteıik, buǵan deıin Almaty metrosynyń beketterinde platformalyq esikterdi ornatýǵa 7 mlrd teńge jumsalatynyn jazǵanbyz.
