Senator Álı Bektaev: Prezıdenttiń tapsyrmalaryn oryndaý elimizdegi turaqtylyqty qamtamasyz etýge kómektesedi
NUR-SULTAN. QazAqparat - Senat depýtaty Álı Bektaev Memleket basshysynyń tóraǵalyǵymen ótken Qaýipsizdik Keńesiniń otyrysy jáne onda qabyldanǵan sharalar týraly pikir bildirdi. Ol keıbir óńirlerde oryn alyp otyrǵan zańsyz áreketterdi aqtaý múmkin emes ekenin aıtty, dep habarlaıdy QazAqparat.
«Eki-úsh kúnnen beri elimizdiń keıbir óńirlerinde, ásirese Almaty men Shymkent qalalarynda bolyp jatqan oqıǵalardy eshteńemen aqtap alýǵa bolmaıdy. Bul – halqymyz ben turǵyndarymyzdyń ómirine, memleketimizdiń tutastyǵyna, táýelsizdigimizge qaýip tóndiretin oqıǵalar. Sondyqtan el Prezıdenti Qasym-Jomart Toqaevtyń Qaýipsizdik Keńesin jınap, sonda qabyldaǵan sheshimderi óte oryndy jáne ýaqtyly dep esepteımin. Dál qazirgi jaǵdaıda eldegi tártipti qalypqa keltirý úshin, memleketimizdiń tutastyǵyn saqtaý úshin osyndaı naqty sharalar qabyldanýy kerek dep oılaımyn», - dedi senator.
Osy oraıda Álı Bektaev memlekettik organdarmen qatar, qazaqstandyqtarǵa óziniń tilegin jetkizdi.
«Biz óz elimizge ózimiz ıe bolýymyz kerek. Ol úshin biz ózimizdiń ishki tártibimizdi saqtaýymyz kerek. Árqaısysymyz óz balalarymyzǵa, jaqyn týystarymyzǵa ıe bolýymyz qajet. Osyndaı jaǵdaılarda bir-birimizge basý aıtyp, aqyl aıtyp, elimizdiń bolashaǵy úshin shette qarap qalmaýymyz kerek. Keıbir azamattardyń áreketterin sózben, aqylmen jáne parasattylyqpen toqtatýǵa áreket jasaý mańyzdy dep oılaımyn. Sondyqtan, qazirgi ýaqytta Memleket basshysynyń tarapynan jasalyp jatqan sharalar tez arada osy turaqtylyqty qamtamasyz etýge múmkindik beredi», - dedi senator.
Álı Bektaev sóz sońynda b izdiń memleketimizdiń tártipti rettep, ári qaraı damı berýine múmkindigi baryn aıtty.
