Senator Álı Bektaev OQO-daǵy birqatar qala-aýdan turǵyndarymen kezdesti
ShYMKENT. QazAqparat - QR Parlament Senatynyń depýtaty Túrkistan qalasy men Otyrar aýdanynda arnaıy issaparmen bolyp, jergilikti turǵyndarmen kezdesti. Prezıdenttiń bes áleýmettik bastamasyn jurtshylyqqa túsindirip, qujattyń mańyzdylyǵyna toqtaldy, dep habarlaıdy QazAqparat tilshisi.
Senator Túrkistandaǵy Halyqaralyq qazaq-túrik ýnıversıtetiniń stýdentterimen áńgimelesip, «Turǵyn úı» baǵdarlamasyn egjeı-tegjeıli túsindirip berdi.
«Aýyldan jumys izdep, otbasymen qalaǵa sabylǵan jastardyń qarasy qalyń. Páter jaldap, jalaqysyna jan baǵa almaı júrgen jigitter úshin 7-20-25 baǵdarlamasy tıimdi tásil. Sebebi, qazir elimizde arzandatylǵan ıpotekalyq nesıe arqyly beriletin úılerdiń qurylysy da qarqyn alǵan. Áleýmettik bastamalar aýyldyń turǵyndaryna oń áser etetin, tikeleı turmys-tirshiligin ońaltýǵa baǵyttalǵan. Sonyń ishinde qalada oqyp, jumys istep jatqan aýyl jastaryna kórsetilip jatqan úlken qamqorlyq dep aıtar edim. Turǵyndar da, jastar da Elbasynyń áleýmettik bastamalaryn qoldap jatyr»,- deıdi senator Álı Ábdikerimuly.
Dál osyndaı kezdesý Otyrar aýdanynda da ótti. Senator ondaǵy azamattardyń baspana alýǵa degen múmkindigin molaıtyp, jastardyń joǵary bilim alýyna jol ashqan bes bastamanyń tıimdi tetikterin túsindirdi. Basqosýda jergilikti halyqty mazalaǵan máseleler de nazardan tys qalmady. Jıyn barysynda aýdan aqsaqaldary kókeıkesti suraqtaryn qoıyp, tuşymdy jaýap aldy.
