Senator: Aqparattyq júıedegi aqaýdan fermerler sýbsıdııaǵa ótinish bere almaı álek

ASTANA. QazAqparat – Aqparattyq júıedegi tehnıkalyq aqaý saldarynan fermerler sýbsıdııa alýǵa ótinish bere almaı otyr. Búgin Senattyń jalpy otyrysynda depýtat Evgenıı Bolgert óziniń depýtattyq saýalynda aýyl sharýashylyǵy taýaryn óndirýshilerdiń problemalary týraly aıtty, dep habarlaıdy QazAqparat tilshisi.

Senator bıylǵy 1 qańtardan bastap, fermerlerge sýbsıdııa alýǵa ótinimder berý jańa gosagro.kz aqparattyq júıesi arqyly júzege asatynyn eske saldy. Biraq, qazir fermerler júıeniń durys jumys istemeýine baılanysty ótinim bere almaı otyr.

«Onda birqatar baǵyttar boıynsha sýbsıdııa alýǵa ótinimder berýge múmkindik joq. Máselen, júıe sýbsıdııa alý úshin qajet barlyq qujattyń jıyntyǵyn qabyldamaıdy. Quny 30 mln teńgeden sál asatyn jańbyrlatyp sýaratyn mashınany satyp alý úshin sýbsıdııaǵa ótinim berý kezinde jańa gosagro.kz júıesi 46 mıllıard teńge somasyn esepteıdi. Osy oraıda, ondaǵy tıisti qyzmet mundaı qate ótinimder qabyldanbaıdy dep, birden jaýap beredi. Olar kemshilikterdi túzetýge ýáde bergenimen, eshqandaı ózgeris joq. Júıeniń qatelikterin sharýalardyń ózderi de, olardyń esepshileri de túzete almaı otyr», - dedi Evgenıı Bolgert.

Depýtat bul jaǵdaı kóktemgi egis naýqanyna daıyndyq tusynda, ıaǵnı sharýalarǵa janar-jaǵarmaı materıaldaryna, tyńaıtqyshtarǵa, qosalqy bólshekterge qarjy qajet bolǵan kezde bolyp jatqanyn aıtty.

«Osy oraıda, Úkimet gosagro.kz aqparattyq júıesiniń jumysyndaǵy tehnıkalyq kemshilikterge shuǵyl túrde nazar aýdarýy kerek», - dedi senator.