Senator Aqmola oblysyndaǵy temirjol stansalarynda bolýy múmkin problemany kóterdi
ASTANA. KAZINFORM – Jolaýshylar poıyzdarynyń qozǵalys kestesiniń bıylǵy 1 sáýirden bastap ózgerýine baılanysty Aqmola oblysynda problemalyq jaǵdaı qalyptasýy múmkin.
Ol «Aqkól» jáne «Jaqsy» stantsııalaryndaǵy áleýmettik mańyzy bar baǵyttardaǵy aıaldamalardy joıý týraly sheshimge qatysty bolyp otyr.
Osy oraıda senator Talǵat Júnisov Úkimet basshysynyń birinshi orynbasarynyń atyna joldaǵan depýtattyq saýalynda osy máselege nazar aýdardy.
Onyń aıtýynsha, «Aqkól» stantsııasy Aqkól aýdanynyń ǵana emes, Stepnogorsk qalasynyń, sondaı-aq jaqyn mańdaǵy eldi mekenderdiń turǵyndaryna kólik tasymalyn qamtamasyz etedi. Jalpy alǵanda, ol 100 myńnan astam adam jáne olardyń kólikpen qatynasy temirjol arqyly ǵana júzege asady. Olarǵa temirjol kóligi qozǵalystyń negizgi túri sanalady.
Senator Jaqsy aýdanyndaǵy jaǵdaıǵa erekshe toqtaldy. Onda jolaýshylar poıyzdary endi toqtamaı ótip ketetin boldy. Shamamen 16 myń adam turatyn bul aımaqtaǵy stýdentter, zeınetkerler jáne patsıenttermen qosa turǵyndardyń edáýir bóligi basqa óńirge barý úshin temirjol kóligin turaqty túrde paıdalanady.
- Jolaýshylar poıyzdarynyń aıaldamaǵa toqtamaı ótip ketýi óńirdegi kólikpen tasymaldyń shektelýine, halyqqa qarjy aýyrtpalyǵynyń ulǵaıýyna jáne azamattardyń medıtsınalyq, bilim berý jáne ózge de áleýmettik mańyzy bar qyzmetterdi alý múmkindiginiń azaıýyna ákeledi, - deıdi Talǵat Júnisov.
Senator bul sheshim qazirdiń ózinde qoǵamdyq aýqymdy dúrbeleń týǵyzǵanyn jáne óńirdegi áleýmettik shıelenisti kúsheıtetinin, osyǵan baılanysty atalǵan stantsııalarda jolaýshylar poıyzdarynyń aıaldamalaryn saqtaý múmkindigin qarastyrý qajettigin atap ótti.
Aıta keteıik, bıyl 3700 shaqyrymnan astam jańa temirjol jelileri tóselip, paıdalanýǵa beriledi.
