Senator Aqmaral Álnazarova DDU ókilimen kezdesti
NUR-SULTAN. QazAqparat - Parlament Senatynyń depýtaty Aqmaral Álnazarova Dúnıejúzilik densaýlyq saqtaý uıymynyń (DDSU) Qazaqstandaǵy eldik keńsesiniń basshysy doktor Karolın Klarınvalmen kezdesti, dep habarlaıdy QR Parlamenti Senatynyń baspasóz qyzmeti.
Taraptar COVID-19-ǵa qarsy kúres máselelerin, onyń ishinde Qazaqstandaǵy aǵymdaǵy jaǵdaıdy, sonymen qatar Aral óńirindegi halyqtyń densaýlyǵyn qorǵaý máselelerin talqylady.
Senator Aqmaral Álnazarova Dúnıejúzilik densaýlyq saqtaý uıymynyń Qazaqstanǵa Covid-19 pandemııasymen kúreste kórsetken jan-jaqty qoldaýy men yntymaqtastyǵy úshin DDSU-nyń resmı ókiline alǵys aıtty.
«DDSU bılik organdarynyń mańyzdy seriktesi bolyp keledi, óıtkeni uıym COVID-19-ǵa jaýap retinde tehnıkalyq usynystar ázirleıdi, ózge de tehnıkalyq bilikti resýrstaryn usynady. Bizdi halyq densaýlyǵyn saqtaý men zań shyǵarý máselelerindegi ózara yntymaqtastyǵymyz qýantady», - dep atap ótti Senat depýtaty.
Doktor Klarınval, óz kezeginde, DDSU Qazaqstannyń COVID-19-ǵa qarsy kúrestegi kúsh-jigerin, sondaı-aq pandemııamen kúrestiń aldyńǵy shebinde júrgen qazaqstandyq medıtsına qyzmetkerleriniń kásibıligi men jankeshtiligin joǵary baǵalaıtynyn jetkizdi. Sondaı-aq, ol DDSU Qazaqstanǵa epıdemıologııa, qaýip-qater kommýnıkatsııasy, logıstıka jáne ózge de densaýlyq saqtaý baǵyttarynda qoldaý kórsetýdi jalǵastyratynyn aıtty.
«Yntymaqtastyq, ózara is-qımyl, bilim jáne resýrstar almasý neǵurlym tez áreket etý úshin asa mańyzdy, sondyqtan halyqtyń densaýlyǵyn qorǵaý jolynda barlyq taraptar arasynda syndarly dıalog qura otyryp, bir baǵytta júrýdi jalǵastyrý mańyzdy», - dep túıindedi DDSU-nyń Qazaqstandaǵy eldik keńsesiniń basshysy.
