Senator agrarlyq sektordy qarjylandyrýǵa qatysty usynys aıtty

ASTANA. KAZINFORM – Senat depýtaty Sáken Arýbaev óziniń depýtattyq saýalynda fermerlerdi qarjylandyrýdaǵy júıeli máselelerge nazar aýdardy.

- Agroónerkásiptik keshendi qarjylandyrý tetikteriniń tıimdiligi men qoljetimdiligi - memlekettik agrarlyq saıasattyń negizgi kórsetkishteriniń biri. Agrarlyq sektordy qoldaýda birqatar júıeli sharalar qabyldanyp, aýqymdy jumystar atqaryldy. Degenmen, qarjylandyrý júıesinde sheshýdi qajet etetin máseleler áli de bar, - dedi senator Úkimet basshysynyń atyna joldaǵan saýalynda.

Depýtattyń aıtýynsha, qoldanystaǵy baǵdarlamalar salaǵa aıtarlyqtaı kólemde qarjy bólýge múmkindik bergen, alaıda birneshe kedergiler áli de AÓK-tiń damýyn tejep otyr. Atap aıtqanda, bul protsesterdiń tsıfrlandyrylý deńgeıiniń tómendigine, ótinimderdi qaraý merziminiń uzaqtyǵyna, kepil múlkin tómen baǵalaýǵa, sondaı-aq mal sharýashylyǵy men ósimdik sharýashylyǵyn qarjylandyrý deńgeıiniń jetkiliksizdigine qatysty.

Sonymen qatar senator sýbsıdııalardyń ýaqytyly tólenbeýi fermerlerge qosymsha qarjylyq júkteme túsiretinin, sondaı-aq qaıta óńdeý kásiporyndaryn kredıtteý merzimderiniń shekteýliligi men aýyl sharýashylyǵy jerlerin jalǵa alý merzimin uzartýdaǵy qıyndyqtardy atap ótti.

Osyǵan baılanysty Sáken Arýbaev qarjylandyrýdyń qoljetimdiligin arttyrýǵa baǵyttalǵan keshendi sharalardy usynady. Onyń ishinde nesıeleý protsesterin tolyq tsıfrlandyrý, qaryz alýshylardy baǵalaýdyń skorıngtik modelderin engizý, naryqtyq baǵalardy eskere otyryp qarjylandyrý lımıtterin qaıta qaraý jáne sýbsıdııalardyń ýaqytyly tólenýin qamtamasyz etý bar.

Budan bólek, saýalda qaıta óńdeý kásiporyndary úshin aınalym qarajatyna nesıe berý merzimin uzartý, jerdi jalǵa alý merzimin uzartý rásimderin jeńildetý usynylǵan.

Aıta keteıik, bıyl aqpan aıynda AShM fermerlerge tikeleı sýbsıdııa berý tetikterin túsindirdi.