Senator Abylaı hannyń 300 jyldyǵyn kelesi jyly toılaýdy usyndy

Senatordyń aıtýynsha, qazaqtyń uly hany Abylaıdyń týǵan jáne ómirden ótken jyldary qazirgi tarıhymyzda ártúrli kórsetilip keledi. Máselen, buryndary Abylaıhan 1711 jyly dúnıege keldi degen derekke súıengen bolsaq, keıin keıbir zertteýshiler 1713 jyly týǵan degendi usynyp, óz dálelderin keltirip júr. Qazir Abylaıhan 1710 jyly týǵan degen taǵy da bir tyń derekter  alǵa tartylýda.

«Árıne, bul másele jóninde Qazaqstan tarıhshylary bir mámilege keletin de bolar. Alaıda, osy derekterdiń áli de bolsa bir pikirge toǵystyrylmaýynyń nátıjesinde han Abylaıdyń 300 jyldyǵy el boıynsha atalmaı qalyp otyr», - deıdi J. Erǵalıev.

 Onyń sózine qaraǵanda, tarıhı uly tulǵalardyń týǵan jáne qaıtys bolǵan jyldary týraly túrli pikirlerdiń oryn alýy bolyp jatady. Mysaly, Shyńǵys hannyń da týǵan jyly tarıhı derek kózderinde ártúrli etip kórsetilgendigine qaramastan, kórshi Monǵolııa eli 2002 jyly óz handarynyń 840 jyldyǵyn bar sán-saltanatymen atap ótken.

«Aldaǵy 2013 jyly Úkimet qaýlysymen jáne respýblıkalyq bıýdjetten qarjy qarastyra otyryp, uly hannyń 300 jyldyǵyn el boıynsha atap ótý sharalaryn osy bastan oılastyrǵan jón bolar edi. Bul oraıda Abylaıhan jóninde kórkem fılm úshin jarııalanǵan respýblıkalyq konkýrsta birinshi oryndy jeńip alǵan Qazaqstannyń halyq jazýshysy Sáken Júnisovtiń «Abylaıhan» kınostsenarıi boıynsha óz kınogerlerimizdiń kórkem fılm túsirýi jáne «Abylaıhan» entsıklopedııasyn shyǵarý qolǵa alynsa eken deımiz. Uly hannyń bul mereıtoıy táýelsiz el bolǵanymyzdy jáne álem aldyndaǵy abyroıymyz ben aıbynymyzdyń asqaqtyǵyn taǵy da bir áıgileıtindeı tutas bir eldik shara bolǵanyn qalar edik», - deıdi J. Erǵalıev.