Senator A.Bıjanov: Aýyldarda kópshilikke qoljetimdi sporttyq qurylǵylardy ornatý dástúrin qaıta jandandyrý qajet

- dedi búgin «Dene shynyqtyrý jáne sport týraly» zańynyń oryndalý barysyna baılanysty Sport jáne dene shynyqtyrý agenttiginiń tóraǵasy Talǵat Ermegııaevpen kezdesý barysynda senator Aqan Bıjanov.

Onyń sózinshe, joǵary deńgeıdegi jetistikteri bar sporttyń, kez kelgen memlekettiń álemdik arenadaǵy jaǵymdy beınesin qalyptastyrýǵa yqpal etetini belgili. Sondaı-aq  buqaralyq sportty qarqyndy damytpaıynsha, eldegi demografııalyq jáne áleýmettik máselelerdi de sheshý is júzinde múmkin emes.

«Bıylǵy jylǵy Joldaýynda Elbasy Nursultan Nazarbaev ta salaýatty ómir saltyn qalyptastyrý men dene shynyqtyrý jáne sportpen aınalysýdyń áleýmettik áleýetti jetildirýge zor septigin tıgizetinin atap ótti. Al bul jaǵdaı qoǵamnyń áleýmettik-ekonomıkalyq damýyna tikeleı yqpal etpek. Bul mindetti júzege asyrý úshin, quzyrly mınıstrlikter men vedomstvolar jáne ákimdikter tarapynan dene shynyqtyrý men sportty damytý baǵytynda naqty is-sharalar júzege asyrylýy kerek. Memleket basshysynyń aıtýynsha, salaýatty ómir salty men sportty damytý baǵytynda sheshilmegen problemalar jeterlik. Naqtyraq aıtqanda, ol birinshi kezekte sporttyq nysandar men saýyqtyrý ortalyqtarynyń jáne trenajer zaldarynyń baǵalarynyń tym qymbat bolýymen baılanysty»,-dedi senator.

Onyń sózinshe, elde sporttyq qurylǵylar men olardyń tıimsiz paıdalanylýy jaǵdaıǵa keri áserin tıgizip otyr. «Sport salasynda kásibı maman tapshylyǵy jáne salaýatty ómir saltyn qalyptastyrýdy qajetti deńgeıde nasıhattaı almaý - úlken másele. Mysal retinde aıtqanda, elimizdiń birqatar qalalaryndaǵy turǵyn úılerdiń  aýlalarynda arnaıy jaraqtandyrylǵan sporttyq qurylǵylar joq. Osy rette elimizdiń ár aýylynda qalyń kópshilikke, ásirese, jastarǵa qoljetimdi sporttyq qurylǵylar ornatý jónindegi ıgi dástúrdi qaıta jandandyrý qajettigin aıtqym keledi. Bálkim bul qurylǵylar qajetti talaptarǵa 100 paıyz saı bolmaýy múmkin. Desek te,  balalarǵa qajetti fýtbol jáne basketbol alańdaryn qalpyna keltirýimiz kerek»,-dedi A.Bıjanov.