Senator Á. Ahmetov Úkimet basshysynan «Ǵajaıypstanǵa saıahat» jobasyn óz qamqorlyǵyna alýyn suraıdy
TANA. 20 qazan. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda senator Ádil Ahmetov QR Premer-Mınıstri Kárim Másimovtiń atyna depýtattyq saýal joldady.
Onda depýtat «Balapan» arnasynan shyǵyp turǵan «Ǵajaıypstanǵa saıahat» jobasyna qoldaý bildirýdi surady.
«Memleket basshysy N.Nazarbaev bıylǵy aqpan aıynda respýblıkadaǵy jetekshi buqaralyq aqparat quraldary ókilderimen ótkizgen suhbatynda memlekettik tilde habar taratatyn úsh telearna uıymdastyrý týraly tapsyrma bergeni málim. Sonyń biri «Qazaqstan» RTRK bazasyndaǵy «Balapan» baǵdarlamasy bolatyn. «Balapan» - qazaq televızııasynyń tarıhyndaǵy balalarǵa arnalǵan tuńǵysh jeke telearna. Prezıdenttiń bul bastamasyna «Medıasıstema» Óndiristik televızııalyq kompanııasy da atsalysty. Osy ujymnyń jedel qolǵa alýymen respýblıkada alǵash ret 200 serııadan turatyn balalarǵa arnalǵan «Ǵajaıypstanǵa saıahat» atty oqý-tanymdyq anımatsııalyq serıal daıyndaldy. Buny el Táýelsizidiginiń 20 jyldyǵyna jasalǵan tartý dep bilemiz», - deıdi senator.
Onyń pikirinshe, atalmysh serıal búldirshinderdi ana tilin úırenýge, qorshaǵan ortany tanýǵa, tabıǵattyń túrli qubylystaryn jete túsinýge tárbıeleıdi. Qyzyqty da shytyrmanǵa toly hıkaıalar jasóspirimderdiń dúnıetanymyn keńeıtip, olardyń sanasy men ómir jaıly túsinigin shıratýǵa baǵyttalǵan, tili jeńil, bala uǵymyna saı. Sonymen qatar, bul serıaldar basqa etnos balalaryna qazaq tilin úıretýde de úlken ról atqarady ári balalardyń boıyna adamı qundylyqtardy sińirýde tanymdyq jáne tárbıelik máni zor.
«Búgingi tańda «Ǵajaıypstanǵa saıahat» - «Balapan» jáne «Qazaqstan» telearnalarynyń betke ustar serıaldarynyń biri jáne balalar kınosy men anımatsııalyq fılmderdiń otandyq qorynan da ózindik ornyn alǵany ras. Aıta ketý kerek, «Ǵajaıypstanǵa saıahat» serıaldary QR Ádilet mınıstrligi Sot saraptama ortalyǵynyń súzgisinen ótip, basqa anımatsıalyq fılmdermen salystyrǵanda olardyń baǵasynyń 16 -23 ese tómen ekendigi anyqtaldy. Tárbıe kózi bala kezden bastalady. Balalardy qazaq tiline úıretse, olar taza qazaqsha sóılep tursa, bul tilimizdiń bolashaǵyna jol ashatyny sózsiz. Eń bastysy, kútken telearna ashyldy. Endi sonyń sátti jumys isteýine úlken qamqorlyq qajet. Osyny eskere otyryp, atalmysh jobanyń qarjy tapshylyǵyna oraı jabylyp qalmaýyna, odan ári damýyna Úkimet basshysy retinde zor qoldaý jasaıdy degen senimimiz mol. Balalar súıip kóretin «Ǵajaıypstanǵa saıahat» atty jobany óz qamqorlyǵyńyzǵa alyp, ana tilimizdiń kórkeıýine, bolashaq otansúıgish qazaqstandyqtardy tárbıeleýge óz úlesińizdi qosatynyńyzǵa senemiz», - dedi senator.
