Senator 2-3 myń stýdenti bar ýnıversıtetterdi jabýǵa keńes berdi
ASTANA. QazAqparat - Búginde 2-3 myńdaı ǵana stýdenti bar qazirgi «ýnıversıtetterdi» statýsynan aıyryp, tıisinshe akademııalar, ınstıtýttar qylyp qaıta qurý týraly Zańdarǵa tolyqtyrýlar men túzetýlar engizý kerek. Mundaı oıdy búgin OKQ brıfınginde QR Parlamenti Senatynyń depýtaty Murat Baqtııaruly aıtty.
«Elimizdegi 17 mln halyqqa 127 joǵary oqý oryny bilim berýde, olardyń 72-si jekemenshik. Joǵary bilim berý salasy eń myqty damyǵan Ulybrıtanııada 63 mln halyqqa nebary 89 JOO bar. Sondyqtan biz JOO sany jóninen álemniń alǵashqy ondyǵyna kiremiz, al sapasy jóninen oılanatyn másele óte kóp», - deıdi ol.
Depýtattyń aıtýynsha, damyǵan memleketterde joǵary bilimdi mamandar qansha kerek, qaı salaǵa qajet degen málimeterdi zerttep, rettep otyratyn arnaıy ınstıtýttar jumys jasaıdy.
«Al bizdiń elimizde ondaı qyzmet ázirge joq. Qazir elimizdegi jastardyń 63 paıyzy joǵary oqý oryndarynda bolsa, nebary 17 paıyzy kásiptik tehnıkalyq kolledjderde, lıtseılerde oqıdy. Al 20 paıyzdaıy esh jerde oqymaıdy. Bul úlken problema», - deıdi M. Baqtııaruly.
Onyń málimeti boıynsha, qazirgi kezde elimizdegi JOO-lardyń 82-si ýnıversıtet eken.
«Ózderińiz bilesizder, kezinde Qazaqstanda eki-aq ýnıversıtet elimizdiń barlyq óńirlerine joǵary bilimdi mamandardy daıyndap jiberip otyrdy. Ýnıversıtetterde 10 myńnan kóp stýdent bolý kerek. Sondyqtan 2-3 myńdaı ǵana stýdenti bar qazirgi «ýnıversıtetterdi» statýsynan aıyryp, tıisinshe akademııalar, ınstıtýttar qylyp qaıta qurý týraly Zańdarǵa tolyqtyrýlar men túzetýlar engizý kerek», - deıdi senator.
