Senatqa saılaý: SQO-da Olga Perepechına jeńiske jetti
SQO-da Senat depýtatyn saılaýǵa oblystyq, aýdandyq jáne qalalyq máslıhattardyń 200-ge jýyq depýtaty qatysty. Saılaýǵa túsýge 5 kandıdat nıet bildirgen edi. Olardyń úsheýi resmı tirkeldi. Alaıda, bir kandıdat óz qalaýymen tizimnen shyqty. Nátıjesinde jınalǵandar eki kandıdat - Dangole Mogýnova men Olga Perepechınaǵa daýys berdi. Olardyń ekeýi de «Nur Otan» partııasynyń múshesi. Saılaý barlyq karantın talaptary saqtala otyryp, dástúrli formatta ótti.
«Saılaýshy retinde 194 adam tirkelgen bolatyn. Búgingi saılaýǵa onyń 188-i qatysty. Saılaýdy barlyq talaptarǵa saı ótkizdik. Sanıtarlyq-epıdemıologııalyq normalardy da esten shyǵarǵan joqpyz. Barlyq erejeler saqtalǵan kúıde, ádil túrde ótti», - deıdi SQO Saılaý komıssııasynyń tóraǵasy Erbolat Bekshenov.
Saılaý nátıjesi boıynsha Olga Perepechına 87,6 % - 162 daýys alyp, jeńiske jetti. Qarsylasynan aıqyn kórsetkishpen basym túsken Olga Perepechına ózin qoldaǵandarǵa alǵys bildirip, qyzmetin adal atqarýǵa ýáde berdi.
QR Parlament Senatyna depýtat bolyp qaıta saılanǵan Olga Perepechına 1989 jyly Qorǵan aýylsharýashylyq ınstıtýtynyń «Ekonomıka jáne aýylsharýashylyq óndiristi uıymdastyrý» mamandyǵy boıynsha bitirgen.