Senat zııatkerlik menshikti qorǵaýdy damytýǵa arnalǵan zańdy maquldady
ASTANA. KAZINFORM – Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine zııatkerlik menshik máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, maquldandy.
Bul zańnyń maqsaty – zııatkerlik menshik quqyqtaryn qorǵaýdy jetildirý, kreatıvti ekonomıkanyń damýyna qolaıly jaǵdaı jasaý, ınvestıtsııalar tartý jáne osy saladaǵy quqyqtyq retteýdi tıimdi ári zamanaýı talaptarǵa sáıkestendirý. Zań jobasy avtorlyq quqyq, sabaqtas quqyqtar, taýar tańbalary, patentter jáne ózge de zııatkerlik menshik obektilerine qatysty normalardy naqtylaıdy jáne damytady.
- Onyń erejeleri Qazaqstannyń halyqaralyq mindettemelerin, sonyń ishinde Dúnıejúzilik zııatkerlik menshik uıymy aıasyndaǵy talaptardyń, sondaı-aq tsıfrlandyrýdyń jáne kreatıvti ındýstrııanyń damýynyń zamanaýı úderisterin eskeredi. Zań jobasymen kelesi negizgi ózgerister men tolyqtyrýlar engiziledi. Birinshiden, efırlik jáne kabeldik habar taratýshy uıymdardyń óz habarlaryn, onyń ishinde qaıta translıatsııalaý quqyqtaryn naqtylaý kózdeledi. Bul quqyq ıelerin qorǵaýdy kúsheıtedi jáne kontentti ruqsatsyz paıdalanýǵa jol bermeıdi. Ekinshiden, kórý qabileti buzylǵan azamattardyń avtorlyq quqyqpen qorǵaýǵa alynǵan shyǵarmalarǵa qol jetkizý múmkindigi keńeıtiledi, ıaǵnı zańdy jarııalanǵan shyǵarmalardy arnaıy qoljetimdi formattarda taratýǵa, kórsetýge jáne oryndaýǵa quqyq beriledi. Bul ınklıýzıvti qoǵam qurý qaǵıdasyn qamtamasyz etedi, - dedi senator Janna Asanova.
Úshinshiden, taýar tańbalaryna berilgen ótinimderdi jedeldete saraptaýdyń jańa tetigi engizilýde. Jedeldetilgen tártippen aldyn ala saraptama on jumys kúni ishinde, al tolyq saraptama úsh aı ishinde júrgiziledi. Salystyrmaly túrde aıtsaq, ádettegi tártipte bul merzimder tıisinshe bir aı jáne jeti aı bolǵan. Bul jańashyldyq taýar tańbalaryn tirkeý úderisin aıtarlyqtaı jedeldetedi, bul ásirese shaǵyn jáne orta bıznes sýbektileri úshin asa mańyzdy.
Tórtinshiden, taýar belgisin tirkeýge qarsylyq bildirý merzimi 1 aıdan 2 aıǵa deıin uzartyldy. Bul múddeli tulǵalarǵa quqyqtyq dálelderin sapaly daıyndaýǵa múmkindik beredi.
Besinshiden, taýar belgilerin tirkeýden bas tartý negizderi naqtylanady, onyń ishinde qyzmet kórsetý orny eskeriledi. Bul túzetý quqyqtyq aıqyndyqty arttyrýǵa jáne naryq qatysýshylary arasyndaǵy daýlardy aldyn alýǵa baǵyttalǵan.
- Altynshydan, ónertabysqa patent berýden resmı saraptama kezeńinde-aq bas tartý múmkindigi engiziledi. Bul ótinimderdi qaraý ýaqytyn qysqartady jáne patent sapasyn arttyrady. Sonymen qatar, zańda quqyqtardy ujymdyq basqarý júıesiniń ashyqtyǵyn qamtamasyz etýge baǵyttalǵan túzetýler kózdelgen. Ol úshin bul júıe tsıfrlandyrylyp, quqyqtardy ujymdyq basqarý salasynda biryńǵaı tsıfrlyq platforma engiziledi. Bul avtorlar men quqyq ıeleriniń óz týyndylarynyń paıdalanylǵany úshin ujymdyq basqarý mehanızmi arqyly ádil syıaqy alýyna múmkindik beredi, - dedi depýtat.
Atap aıtqanda, zańdaǵy mańyzdy jańalyqtardyń biri, osy biryńǵaı tsıfrlyq platformany engizý normasy. Ony engizý, basqarý, aqparatpen tolyqtyrý qyzmetin qamtamasyz etip, júıelik-tehnıkalyq qyzmet kórsetý jumystaryn Ádilet mınıstrligine baǵynysty mamandandyrylǵan uıym – «Ulttyq zııatkerlik menshik ınstıtýty» júzege asyrady.
Osyǵan baılanysty ujymdyq negizde quqyq basqaratyn uıymdar úshin birqatar mindetter belgilenedi, onyń ishinde:
- biryńǵaı platformany paıdalaný,
- jınalǵan, bólingen jáne tólengen syıaqy týraly málimetterdi platformaǵa engizý,
- basqarýǵa berilgen quqyqtar týraly aqparatty jarııalaý jáne osy uıymdardyń qyzmetiniń tıimdiligin qamtamasyz etýge baǵyttalǵan ózge de mindetter qarastyrylǵan.
- Platformany engizý ujymdyq negizde múliktik quqyqtardy basqaratyn uıymdardyń qyzmetin ashyq etedi. Bul rette, endi avtorlarmen shart jasasýdan bastap, syıaqyny tóleýine deıingi barlyq úderister aıqyn bolady. Avtorlar men quqyq ıelenýshilerge qoljetimdilik berilip, bul óz kezeginde ujymdyq quqyqtardy basqarý júıesine degen senimdi arttyrady. Sonymen qatar, zańnamada termınologııalyq ózgeris engizilip, «múliktik quqyqtardy ujymdyq basqarý uıymy» ataýy «quqyqtardy ujymdyq basqarý uıymy» dep naqtylanady. Zań memlekettik organdardyń ókilettikterin naqtylaı otyryp, reestrler júrgizý tártibin jetildiredi jáne zııatkerlik menshik obektilerin tirkeý kezindegi teris áreketter múmkindigin joıady, - dedi J. Asanova.
Buǵan deıin zııatkerlik menshik avtorlary quqyǵynyń ashyqtyǵy men qorǵalýyn kúsheıtý úshin avtorlyq jáne ujymdyq basqarý salasynda tsıfrlyq platforma engiziletinin jazǵan edik.