Senat jumyspen qamtý jáne áleýmettik qorǵaýǵa baǵyttalǵan zańdy qabyldady
ANA. 9 maýsym. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine jumyspen qamtý jáne halyqty áleýmettik qorǵaý máseleleri boıynsha ózgerister men tolyqtyrýlar engizý týraly» QR Zańyn qabyldady.
Qujattyń maqsaty - áleýmettik qamsyzdandyrýǵa jáne jumyssyzdyqtan áleýmettik qorǵaýǵa arnalǵan memlekettik kepildikterdiń normatıvtik quqyqtyq bazasyn jetildirý bolyp tabylady. Osy rette zań jobasymen «Turǵyn úı qatynastary týraly», «Neke jáne otbasy týraly», «Halyqty jumyspen qamtý týraly», «Memlekettik ataýly kómekter týraly» zańdaryna ózgerister men tolyqtyrýlar engizý qarastyrylady. Atap aıtqanda, halyq úshin de, jumys berýshiler úshin de jumyspen qamtý salasyndaǵy kórsetiletin qyzmetter sapasyn arttyrýǵa múmkindik beretin halyqty jumyspen qamtý ortalyqtary qurylatyn bolady. Óz betinshe jumyspen aınalysýshy azamattardy Halyqaralyq eńbek uıymynyń ádisnamasyna sáıkes toptarǵa bólýdi eskere otyryp, jumys oryndaryn jáne jastar praktıkasyn qurý men qarjylandyrýdyń biryńǵaı tártibi aıqyndalatyn bolady. Budan bólek, jumyspen qamtý salasyndaǵy memlekettik saıasatty iske asyrýǵa qatysýyna baılanysty turǵyn jaıǵa muqtaj azamattardyń sanattaryn, olarǵa jalǵa beriletin turǵyn jaı berýdiń sharttary bekitilmek.
Sonymen qatar zań jobasymen jetim balany jáne ata-ana qamqorlyǵynsyz qalǵan balany qorǵanshylyǵyna (qamqorlyǵyna) alǵan otbasylardy áleýmettik qoldaýdy kúsheıtý arqyly ana men balany qorǵaýdyń memlekettik júıesin jetildirý kózdeledi.
Parlament qabyldaǵan zań Memleket basshysynyń qol qoıýyna jiberiledi.
