Senat jumyldyrý daıyndyǵyn jetildirýge baǵyttalǵan zań jobasyn Májiliske qaıtardy
ASTANA. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine jumyldyrý daıyndyǵy men jumyldyrý máseleleri boıynsha ózgerister men tolyqtyrýlar engizý týraly» zań jobasyn talqylady. Qujatqa birqatar túzetýler engizilgendikten, zań jobasy Májiliske qaıtaryldy.
Zań jobasy memlekettik organdardyń, sondaı-aq jumyldyrý tapsyrystary bar uıymdardyń jumyldyrý daıyndyǵy júıesin jetildirýge baǵyttalady. Ulttyq ekonomıka mınıstri Erbolat Dosaevtyń aıtýynsha, Qazaqstan Respýblıkasynyń qoldanystaǵy áskerı doktrınasynda jumyldyrý daıyndyǵynyń birqatar negizgi mindetteri aıqyndalǵan. Sonymen qatar, qujatta memlekettiń jumyldyrý ázirligin arttyrý sharalary kózdeledi.
«Jumyldyrý daıyndyǵynyń negizgi mindetteriniń biri jumyldyrý daıyndyǵy men jumyldyrý salasyndaǵy normatıvtik-quqyqtyq bazany jetildirý bolyp tabylady. Budan bólek, memlekettiń jumyldyrý ázirligin arttyrý qarastyrylady. Jumyldyrý daıyndyǵynyń negizgi mindetterin iske asyrý jumyldyrý, soǵys jaǵdaıy men soǵys ýaqyty kezeńinde memleketti turaqty basqarýdy júzege asyrýǵa múmkindik beredi. Bul rette zań jobasynda «memlekettik organdardyń jumyldyrý jospary», «ákimshilik aýmaqtaǵy jumyldyrý jospary» degen uǵymdar bekitý bóligine ózgerister engizildi. Sonymen qatar, qoldanystaǵy zańnamaǵa sáıkes, uıymdardyń jumyldyrý, soǵys jaǵdaıy men soǵys ýaqytynda memlekettik qorǵanys múddesine memlekettik tapsyrystar men tapsyrmalardy oryndaýdan bas tartýǵa quqyǵy bolmaıdy. Osyǵan baılanysty qujatta «taýarlar óndirý, jumystardy oryndaý jáne qyzmetter kórsetýdiń tıisti kezeńge arnalǵan jospary» degen uǵymdar bóligine ózgerister engizilip otyr», - dedi Ulttyq ekonomıka mınıstri Erbolat Dosaev.
Mınıstrdiń sózine qaraǵanda, qoldanystaǵy zańnamaǵa sáıkes, Úkimet jumyldyrý daıyndyǵynyń áskerı-ekonomıkalyq jáne komandalyq-shtabtyq oqý jattyǵýynyń is-sharalaryn jáne Qarýly kúshterdiń, basqa da áskerı qurylymdardyń, arnaýly memlekettik organdardyń jumyldyrý sharalaryn uıymdastyrady.
Aıta keterligi, zań jobasyn qaraý barysynda senatorlar qujatty jańa tarmaqpen tolyqtyrdy. Onda negizinen memlekettik rezervtiń debıtorlyq bereshegin esepten shyǵarý qaǵıdalaryn naqtylaý qarastyrylady. Osyǵan oraı, zań jobasy Májiliske qaıtaryldy.
