Senat joǵary bilim salasyndaǵy biliktilikti taný týraly halyqaralyq konventsııany qaraıdy

1. «Joǵary bilim berý salasyndaǵy biliktilikti taný týraly Azııa-Tynyq muhıty óńirlik konventsııasyn ratıfıkatsııalaý týraly» Qazaqstan Respýblıkasynyń Zańy týraly.

2. «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» Qazaqstan Respýblıkasy Konstıtýtsııalyq zańynyń jobasy boıynsha Qazaqstan Respýblıkasy Parlamenti Palatalarynyń birlesken komıssııasynyń quramyna Qazaqstan Respýblıkasy Parlamenti Senatynyń depýtattaryn saılaý týraly.

Senatorlar qaraıtyn Joǵary bilim berý salasyndaǵy biliktilikti taný týraly Azııa-Tynyq muhıty óńirlik konventsııasyn Májilis ótken jyldyń qarasha aıynda qabyldaǵan bolatyn.

Tokıo konventsııasy retinde belgili bul qujat akademııalyq jáne kásibı utqyrlyqty keńeıtýge, dıplomdardy, dárejelerdi jáne ózge de biliktilikterdi tanýdy jeńildetýge baǵyttalǵan.

- Qazaqstan úshin bul qadam halyqaralyq bilim keńistigine yqpaldasý saıasatynyń qısyndy jalǵasy bolyp sanalady. 1998 jyly elimiz Lıssabon konventsııasyna qosylǵannan keıin sheteldik bilim qujattaryn tanýdyń tıimdi júıesin qalyptastyryp, eýropalyq eldermen ózara tanýdy qamtamasyz etti. Al Tokıo konventsııasyn ratıfıkatsııalaý Qazaqstanǵa Azııa-Tynyq muhıty óńiriniń ulttyq aqparattyq ortalyqtar jelisiniń (APNNIC) múshesi bolýǵa múmkindik beredi. Bul jeli qatysýshy elderdiń biliktilikterdi tanýdaǵy aqparat almasýyn qamtamasyz etip, stýdentter men oqytýshylardyń akademııalyq utqyrlyǵyn arttyrady, — degen edi sol kezde Ǵylym jáne joǵary bilim mınıstri Saıasat Nurbek.

Konventsııaǵa qatysýshy memleketter qatarynda Aýstralııa, Japonııa, Qytaı, Koreıa, Túrkııa jáne basqa elder bar. Qazaqstan Ortalyq Azııa elderi arasynda birinshi bolyp Konventsııany ratıfıkatsııalaý jumysyn bastady.

Konventsııany ratıfıkatsııalaý Qazaqstanǵa mynadaı múmkindikterdi ashady:

• Otandyq joǵary oqý oryndarynyń bilim qyzmetterin eksporttaý naryǵyn keńeıtedi.
• Ulttyq joǵary bilim júıesine halyqaralyq senimin nyǵaıtady.
• Qazaqstanda alynǵan dıplomdardy Azııa-Tynyq muhıty óńirinde tanýǵa qoıylǵan kedergiler joıylady.
• Zamanaýı bilim berý tájirıbeleri men tehnologııalaryn almasýǵa jaǵdaı jasaldy.

Esterińizge sala ketsek, ótken jyldyń qyrkúıeginde Májilis «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» Konstıtýtsııalyq zańnyń jobasyn qaraýǵa qabyldady.

Konstıtýtsııalyq zań jobasynyń negizgi maqsattary mynalar: Májilis depýtattyǵyna bir kandıdatty bir saılaý okrýginen artyq saılaý okrýginde usynýǵa tyıym salý, bir adamdy bir mezgilde Májilis pen máslıhattyń bir mandatty okrýgteri boıynsha da usynýǵa tyıym salý, ákimge kandıdattyń saılaý qoryn qurý, prezıdenttikke, depýtattyqqa, ákimge, saılaý komıssııasy múshesine kandıdattarǵa aýyr jáne asa aýyr qylmystar boıynsha sottylyǵynyń bolmaýy boıynsha talaptardy kúsheıtý, úgit-nasıhat máselelerin jáne taǵy basqa máselelerdi retteý.

Al keshe Májilistiń jalpy otyrysynda Parlament palatalarynyń birlesken komıssııasyna tómengi palatadan myna depýtattar saılandy: Marat Bashımov, Murat Ergeshbaev, Snejanna Imasheva, Únzıla Shapaqova.

Sonymen qatar Snejanna Imasheva Májilis atynan atalǵan zań jobasy boıynsha qosymsha baıandamashy retinde belgilendi.

Aıta keteıik, bul - Senattyń bıylǵy alǵashqy otyrysy. Palatanyń ótken jylǵy sońǵy otyrysynda Senat tóraǵasy Máýlen Áshimbaev senatorlardyń bir jyl ishinde atqarǵan jumysyn qorytyndylaǵan edi.

Onyń dereginshe, byltyr palata elimizdiń saıası jáne ornyqty áleýmettik-ekonomıkalyq damýyn qamtamasyz etýdi kózdeıtin 102 zańdy qarady. Depýtattar biraz zańǵa halyq pen óńirlerdiń múddelerin eskere otyryp, tolyqtyrýlar men ózgerister engizdi. Sonymen qatar, senatorlar bastamashy bolyp, 15 jeke zań jobasyn ázirledi.

Budan bólek, turaqty komıtetter jumys josparyna sáıkes 5 úkimet saǵatyn, 50-den astam kóshpeli otyrys, 100-ge jýyq dóńgelek ústel otyrysy men kezdesýler ótkizdi. Sonyń aıasynda Prezıdent tapsyrmalarynyń, zańdardyń jáne memlekettik baǵdarlamalardyń oryndalý barysy jan-jaqty talqylandy. Senatorlar 130-dan asa depýtattyq saýal joldap, Úkimetke ózekti máselelerdi sheshý joldaryn usyndy.

Zań shyǵarý qyzmetimen qatar Senattyń turaqty komıtetteri palata josparyna sáıkes birqatar mańyzdy is-shara uıymdastyrdy. Senatta eńbek adamy jáne zań bilimin damytý máselelerine arnalǵan 2 parlamenttik tyńdaý ótkizildi.

Senattyń halyqaralyq qyzmeti de 140-qa jýyq mazmundy is-sharamen erekshelendi. Álemdik jáne dástúrli dinder lıderleriniń VIII sezin ótkizdi. Іs-sharaǵa álemniń 60-qa jýyq elinen 100-den astam delegatsııa kelip, qatysty.