Senat Joǵarǵy sot sýdıalaryn qyzmetinen bosatyp, birqatar zańdy talqylaıdy
ASTANA. KAZINFORM – Búgin osy aptada ekinshi ret Senattyń jalpy otyrysy ótedi. Onda senatorlar birqatar máseleni qaraıdy.
Naqtyraq aıtqanda, búgingi jalpy otyrystyń kún tártibine myna máseleler engizilgen:
- Joǵarǵy Sot sýdıalaryn qyzmetinen bosatý týraly.
- Qazaqstan men Qyrǵyzstan arasyndaǵy odaqtastyq qatynastardy tereńdetý jáne keńeıtý týraly shartty ratıfıkatsııalaý týraly.
- Qazaqstan men Halyqaralyq Qaıta Qurý jáne Damý Banki arasyndaǵy qaryz týraly kelisimdi (Qazaqstannyń ınklıýzıvti ekonomıkasy úshin jedeldetilgen tsıfrlandyrý jobasy) ratıfıkatsııalaý týraly.
- QR keıbir zańnamalyq aktilerine mindetti áleýmettik medıtsınalyq saqtandyrý jáne medıtsınalyq qyzmetter kórsetý máseleleri boıynsha ózgerister men tolyqtyrýlar engizý týraly (birinshi oqylym).
- QR keıbir zańnamalyq aktilerine astanany jáne respýblıkalyq mańyzy bar qalalardy, ulttyq jobalardy damytý, kásipkerlik jáne memlekettik organdardyń fýnktsııalaryn ońtaılandyrý máseleleri boıynsha ózgerister men tolyqtyrýlar engizý týraly (birinshi oqylym).
- QR keıbir zańnamalyq aktilerine QR qylmystyq zańnamasyn ońtaılandyrý máseleleri boıynsha ózgerister men tolyqtyrýlar engizý týraly (birinshi oqylym).
- QR keıbir zańnamalyq aktilerine áskerı-patrıottyq tárbıe, áskerı qyzmet jáne jekelegen ortalyq memlekettik organdardyń fýnktsııalaryn qaıta bólý máseleleri boıynsha ózgerister men tolyqtyrýlar engizý týraly (birinshi oqylym).
Jalpy otyrystyń kún tártibine shyǵarylǵan ár másele talqylanyp bolǵannan keıin BAQ ókilderine arnalǵan brıfıng uıymdastyrylady. Brıfıng barysynda tilshiler saýalyna myna tulǵalar jaýap beredi:
1. Darhan Qydyráli – QR Parlamenti Senatynyń depýtaty;
2. Bıbigúl Aqqojına – QR Parlamenti Senatynyń depýtaty;
3. Aınur Arǵynbekova – QR Parlamenti Senatynyń depýtaty;
4. Álibek Náýtıev – QR Parlamenti Senatynyń depýtaty;
5. Marat Qojaev – QR Parlamenti Senatynyń depýtaty;
6. Andreı Lýkın – QR Parlamenti Senatynyń depýtaty;
7. Ermuhambet Qonyspaev – QR Syrtqy ister mınıstriniń orynbasary;
8. Dosjan Musalıev – QR Tsıfrlyq damý, ınnovatsııalar jáne aeroǵarysh ónerkásibi vıtse-mınıstri;
9. Tımýr Sultanǵazıev – QR Densaýlyq saqtaý birinshi vıtse-mınıstri;
10. Asan Darbaev – QR Ulttyq ekonomıka vıtse-mınıstri;
11. Baýyrjan Omarbekov – QR Ulttyq ekonomıka vıtse-mınıstri;
12. Laýra Mersalımova – QR Ádilet vıtse-mınıstri;
13. Shaıh-Hasan Jazyqbaev – QR Qorǵanys mınıstriniń tárbıe jáne ıdeologııalyq jumystar jónindegi orynbasary.
Esterińizge sala ketsek, osy dúısenbide ótken Senattyń jalpy otyrysynda depýtattar qujattyń jekelegen baptaryn jańa redaktsııada usynyp, ony Májiliske qaıtarǵan edi.
Senatorlar Májilis qabyldaǵan Kodekske mynadaı negizgi baǵyttar boıynsha ózgerister men tolyqtyrýlar engizdi:
- sharýa nemese fermer qojalyqtarynyń (ShFQ) kiristeri boıynsha jeke tabys salyǵyna (JTS) progressıvti salyq salýdy engizý;
- Qazaqstan qor bırjasy (budan ári – KASE) men «Astana» halyqaralyq qarjy ortalyǵynyń bırjasy arasyndaǵy tórelikti boldyrmaý maqsatynda KASE-de baǵaly qaǵazdardyń aınalysyna baılanysty azamattardyń tabystary boıynsha dıvıdendterdi JTS-tan bosatý boıynsha salyq jeńildigi usynyldy;
- tólem kartochkalaryna baılanysty operatsııalardy qosylǵan qun salyǵynan (QQS) bosatý boıynsha jeńildik kózdeledi. Qazaqstandyq bankterdiń klıentterine qyzmet kórsetý boıynsha halyqaralyq tólem júıelerimen qıyndyqtardy boldyrmaý jáne kartalarmen tólem jasaý kezinde tranzaktsııalar qunynyń qymbattaýyn boldyrmaý úshin qoldanystaǵy jeńildikti saqtaý qajet;
- sán-saltanat zattaryna salyq salý boıynsha jeke normalar belgilenedi. Jeke tulǵalar ǵana sán-saltanat zattaryna aktsız tóleýshiler bolady. Bul rette avtomobılder, kemeler jáne ushý apparattary sııaqty sán-saltanat zattaryna salyq salý olardyń ımporty kezinde ǵana emes, eger olardyń quny shekti somadan artyq bolsa (avtomobılder úshin – 75 mln teńgeden astam, kemeler men ushý apparattary úshin – 100 mln teńgeden astam), olardy el ishinde satý kezinde de salyq salynady;
– beırezıdentter úshin memlekettik baǵaly qaǵazdarmen (MBQ) jasalatyn aınalymǵa baılanysty kirister boıynsha qoldanystaǵy salyq jeńildikterin saqtaý usynyldy. MBQ naryǵyna sheteldik ınvestorlardy tartý ınvestorlyq bazany ártaraptandyrý jáne bıýdjet tapshylyǵyn turaqty qarjylandyrý úshin negizgi baǵyt bolady. Sondyqtan MBQ aınalymdarynan beırezıdentterdiń kiristerine salyq salýdy engizý kapıtaldyń ketýine ákelýi múmkin;
- salyq salý obektisine, salyq bazasyna, salyq tóleýshilerdiń (salyq agentteriniń) sanattaryn ulǵaıtýǵa, shegerimniń nemese jeńildikterdiń kúshin joıýǵa nemese azaıtýǵa qatysty Salyq kodeksine ózgerister aǵymdaǵy jyldyń 1 shildesinen keshiktirilmeı qabyldanatyn jáne olar qabyldanǵan jyldan keıingi jyldyń 1 qańtarynan keıin qoldanysqa engiziletin tolyqtyrý usynylǵan;
- múgedektigi bar adamdar sanalatyn jumyskerler sany keminde 10 adamdy quraıtyn kásiporyndarda taýarlardy, jumystardy, kórsetiletin qyzmetterdi ótkizý boıynsha aınalymdardy QQS-tan bosatatyn norma kózdeledi;
- otandyq merzimdi baspa basylymdaryn ótkizý boıynsha aınalymǵa 10% mólsherinde QQS mólsherlemesi belgilenedi;
- áleýmettik mańyzy bar azyq-túlik taýarlaryn ótkizý boıynsha aınalymdardy QQS salýdan bosatý jónindegi normany alyp tastaý usynyldy.
- Palata jańa Salyq kodeksin qaraý barysynda onyń jekelegen erejelerin memlekettiń, shaǵyn jáne orta bıznestiń, sondaı-aq, qoǵamnyń múddesin eskere otyryp, qaıta qaraýdy usyndy. Sol arqyly áleýmettik mańyzy bar azyq-túlik taýarlaryn óndirýshilerdi, shaǵyn jáne orta kásipkerlik, qor naryǵy sýbektilerin jáne ekonomıkanyń basqa da salalaryn qoldaý kózdelgen. Aldaǵy ýaqytta búgin qaralǵan jańa Salyq kodeksi Prezıdentimizdiń bastamasymen júrgizilip jatqan reformalardy tabysty iske asyrýǵa, ulttyq ekonomıkany serpindi jáne turaqty damytýǵa oń septigin tıgizedi dep senemiz, – degen edi Senat spıkeri Máýlen Áshimbaev.
Depýtattar eki oqylymda qarap, maquldaǵan kelesi zań turǵyn úı qatynastary jáne turǵyn úı-kommýnaldyq sharýashylyq salasyndaǵy zańnamany jetildirýdi kózdeıdi. Atap aıtqanda, «Qazaqstan Respýblıkasynyń keıbir zańnamalyq aktilerine turǵyn úı-kommýnaldyq sharýashylyq, kásipkerlik jáne eksporttyq-kredıttik agenttiktiń qyzmeti máseleleri boıynsha ózgerister men tolyqtyrýlar engizý týraly» zań ashyqtyqty arttyrýǵa jáne kóppáterli turǵyn úılerdi basqarý júıesin jetildirýge arnalǵan. Sondaı-aq kondomınıým obektisin basqarýdyń eki nysanyn engizý, turǵyn úı ınspektsııasynyń quzyretterin keńeıtý jáne jylytý maýsymyna ınjenerlik jeliler men jabdyqtardy, múmkindigi shekteýli adamdar úshin lıftiler men kótergishterdi, órtke qarsy júıelerdi baqylaýdy qamtamasyz etý máselelerine basa mán berildi.
Sondaı-aq senatorlar «Qazaqstan Respýblıkasynyń Ákimshilik quqyq buzýshylyq týraly kodeksine turǵyn úı-kommýnaldyq sharýashylyq máseleleri boıynsha ózgerister men tolyqtyrýlar engizý týraly» zańdy da qarap, maquldady. Zańdaǵy mańyzdy túzetýlerdiń biri – kóppáterli úı múlkiniń menshik ıeleri birlestiginiń tóraǵasy men kondomınıým obektisin basqarý sýbektisi úshin kondomınıým obektisin basqarý jónindegi aı saıynǵy jáne jyldyq esepterdi usyný merzimderin buzǵany úshin jeke jaýaptylyq engizý boldy. Budan basqa, aıyppuldar úıdi basqarýdy júzege asyratyn jeke nemese zańdy tulǵaǵa qoldanylady degen eskertpe kózdelgen.