Senat jer qatynastaryn retteý máselerine arnalǵan zań jobasyn qarady
ASTANA. 15 sáýir. QazAqparat /Marlan Jıembaı/ - Búgin QR Parlamenti Senaty Agrarlyq máseleler jáne qorshaǵan ortany qorǵaý komıtetiniń otyrysy ótip, onda «Qazaqstan Respýblıkasynyń keıbir zańnamalyq aktilerine jer qatynastaryn retteý máseleleri boıynsha ózgerister men tolyqtyrýlar engizý týraly» zań jobasy 2 oqylymda qaraldy.
«Qazaqstan Respýblıkasynyń keıbir zańnamalyq aktilerine jer qatynastaryn retteý máseleleri boıynsha ózgerister men tolyqtyrýlar engizý týraly zań jobasynyń negizgi maqsaty jer zańnamasyn jetildirý, jer kodeksiniń jekelegen erejelerindegi qaıshylyqtar men árkelkilikterdi joıý bolyp tabylady», - dedi Agrarlyq máseleler jáne qorshaǵan ortany qorǵaý komıtetiniń hatshysy Qýanysh Aıtahanov .
Onyń atap ótýinshe, Májilis qabyldaǵan zań jobasyn talqylaý barysynda Senat depýtattary tarapynan birqatar ózgertýler men tolyqtyrýlar engizilgen. Sonyń negizinde 21 pozıtsııadan turatyn salystyrmaly keste túzilgen. Atap aıtqanda, jer kodeksiniń 14,1, 15, 16, 17 jáne 18 baptaryna jer qoınaýyn paıdalaný, jer sharýashylyǵy nysany jobalaryn bekitý máseleri boıynsha jergilikti atqarýshy organdardyń ókilettigin keńeıtý tolyqtyrylǵan.
Zań jobasynda jergilikti atqarýshy organdardyń qyzmetinde rezervteý jónindegi ókilettik qarastyrylatyn jańa baptyń engizilýine baılanysty ýákiletti organnyń usynystar men sheshimder jobalaryn daıarlaý boıynsha tolyqtyrýlar engizilgen.
Depýtattar zań jobasynyń kem-ketigin taǵy bir márte pysyqtaǵannan keıin Senattyń jalpy otyrysyna shyǵarýǵa ýaǵdalasyp tarasty.
