Senat «jasyl ekonomıkaǵa» kóshýdi qarastyratyn zańdy qabyldady

ASTANA. QazAqparat - Búgin Senattyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń «jasyl ekonomıkaǵa» kóshýi máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda talqylap, qujatty qabyldady.

Zań jobasy QR Prezıdentiniń Jarlyǵymen bekitilgen «jasyl ekonomıkaǵa» kóshý tujyrymdamasyn iske asyrýǵa baǵyttalady. Osy baǵytta qoldanystaǵy birqatar zańnamalarǵa ózgerister engizý kózdelip otyr. Atap aıtqanda, Jer jáne Sý kodeksterine nysanaly kórsetkishter men standarttardy ázirleý arqyly sý obektilerin qorǵaýdy jaqsartý normalary usynylady. Sý sapasyn arttyrý, aýyz sýmen jabdyqtaýdy baqylaý kúsheıtiletin bolady. Budan bólek, qaıta óńdeý jáne qaldyqtardan jasalatyn paıdaly materıaldardy qaıtalama paıdalanýdy keńinen qoldaný sharalaryn yntalandyrý qaralyp otyr. Bul rette qaıtadan paıdalanylatyn shıkizatty qoldanǵan taýarlarǵa basymdyq berilip «jasyl satyp alýlar» tetigi engiziledi. Sonymen qatar jańartylatyn energııa kózderi sektoryn damytýdyń nysanaly kórsetkishteri bekitilip, ýákiletti organnyń jańartylatyn energııa kózderi sektoryn josparly túrde damytý sharalary qamtylady.

Ekinshi oqylym barysynda senatorlar sý salasyndaǵy normatıvterdi jetildirýge, óndirýshiniń jaýapkershiligin keńeıtý qaǵıdattaryna baǵyttalǵan ózgertýler engizdi. Sonymen birge, shyǵaryndylardyń jekelegen túrlerimen jumys boıynsha ekologııalyq talaptar men standarttar jetildirilip, kómir kenderinen metan óndirý jobalaryna qatysty ınvestıtsııalyq preferentsııalar usyný, Kaspıı teńizine ekologııalyq monıtorıng júrgizý sekildi máseleler de qamtylǵan.