Senat jaraqattaýshy qarýdy aınalymnan alatyn zań jobasyn Májiliske qaıtardy
ASTANA. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine ishki ister organdarynyń qyzmeti máseleleri boıynsha ózgerister men tolyqtyrýlar engizý týraly» zań jobasyn talqylady.
Qujatqa birqatar ózgerister engizilgendikten, zań jobasy Parlament Májilisine qaıtaryldy.
Zań jobasymen úsh kodeks pen oń zańǵa ózgerister engiziledi. Atap aıtqanda, «Jekelegen qarý túrleriniń aınalymyna memlekettik baqylaý jasaý týraly» qoldanystaǵy zańǵa engiziletin ózgeristerge sáıkes, jaraqattaýshy qarýdy azamattyq aınalymnan alý jáne ony qyzmettik qarý qataryna aýystyrý qaralyp otyr. Budan bólek, quqyq qorǵaý organdary qyzmetkerlerin áleýmettik qoldaý sharalary da kózdeledi.
Atap aıtqanda, «Quqyq qorǵaý qyzmeti týraly» zańǵa ózgerister engiziledi. Bul rette quqyq qorǵaý organdary qyzmetkerlerine qyzmetten bosatylǵan ýaqytta (kedendik qyzmetti qospaǵanda) eńbek sińirgen kúntizbelik jyldarynyń sanyna baılanysty birjolǵy járdemaqy tóleý boıynsha shákildi belgileý qarastyrylyp otyr. Áskerı qyzmette bolýdyń shekti jasyna tolǵannan keıin, densaýlyq jaǵdaıyna nemese shtattardy qysqartýǵa baılanysty eńbek sińirgen jyldary úshin zeınetaqy tólemin alý quqyǵynan aıyrylǵan ofıtserlik quram qyzmetkerlerine jumystan shyǵý járdemaqylaryn tóleýmen qatar, qyzmetten bosatylǵan kúnnen bastap bir jyl boıy arnaıy áskerı ataq boıynsha jalaqylary tólenetin bolady.
Talqylaý barysynda senatorlar tarapynan birqatar túzetýler usynylǵan bolatyn. Osyǵan oraı, zań jobasy Parlament Májilisine qaıtaryldy.
