Senat jańa Salyq kodeksin Májiliske qaıtardy

ASTANA. KAZINFORM — Búgin Senattyń jalpy otyrysynda jańa Salyq kodeksi men ilespe qujat eki oqylymda qaraldy. Senat qujattyń jekelegen baptaryn jańa redaktsııada usynyp, ony Májiliske qaıtardy.

Kodekstiń basty maqsattary:

- ekonomıkanyń ártúrli sektorlaryndaǵy saralanǵan salyq mólsherlemelerine kóshý;

- arnaýly salyq rejımderin reformalaý;

- memlekettik kirister organdary men salyq tóleýshiler arasyndaǵy ózara is-qımyldyń servıstik modeline kóshýdi qamtamasyz etý;

- salyq salasynda ákimshilendirýdi jańartý;

- salyq eseptiligi nysandaryn 30%-ǵa qysqarta otyryp, baqylaýdy tolyq tsıfrlandyrý;

- salyq jáne bıýdjetke tólenetin ózge de mindetti tólemder túrleriniń jalpy sanyn kem degende 20%-ǵa azaıtý;

- memleketimizdiń ınvestıtsııalyq tartymdylyǵyn arttyrý;

- qosylǵan qun salyǵyn qaıtarý protsedýrasyn jeńildetý.

- Korporatıvtik tabys salyǵynyń bazalyq 20%-dyq mólsherlemesin saqtaı otyryp, keıbir salalardyń stavkalaryn saralaý eskerilgen. Kásipkerlik sýbektilerine nesıe berý qyzmetin qospaǵanda, bank sektory úshin mólsherleme 25%-dy quraıdy. Sondaı-aq oıyn bıznesine salyq salý tártibin saqtap, oıyn avtomattary zalynyń, totalızatordyń jáne býkmekerlik keńseniń qyzmeti boıynsha 25%-dyq joǵary stavka kózdeledi. Áleýmettik sala úshin (bilim, medıtsına) stavkany kezeń-kezeńimen 2026 jyldan bastap 5%-ǵa, 2027 jyldan bastap 10%-ǵa arttyrý qarastyrylǵan. Aýyl sharýashylyǵy taýaryn óndirýshiler úshin mólsherleme 3 paıyz deńgeıinde ózgerissiz kalady, - dedi senator Bekbolat Orynbekov.

Atap aıtqanda, salyq ári bıýdjettik reforma aıasynda qosylǵan qun salyǵynyń bazalyq mólsherlemesin 12%-dan 16%-ǵa deıin arttyryp, salalar boıynsha saralanǵan stavkalar usynylady.

- Dárilik zattar, medıtsınalyq buıymdar men medıtsınalyq qyzmetter úshin qosylǵan qun salyǵy 2026 jyldan bastap 5 paıyz, 2027 jyldan bastap 10 paıyz deńgeıinde tómendetilgen mólsherlemesi belgilenedi. Bul rette, tegin medıtsınalyq kómektiń jáne mindetti medıtsınalyq saqtandyrýdyń kepildik berilgen kólemi aıasynda, sondaı-aq Úkimet tizbesimen aıqyndalǵan áleýmettik mańyzdaǵy jáne orfandyq aýrýlardy emdeıtin dárilik zattar men medıtsınalyq qyzmetter, áleýmettik mańyzy bar azyq-túlik taýarlaryn jáne taǵy da basqalardy bosatý usynyldy, - dedi depýtat.

Onyń aıtýynsha, «sán-saltanat» zattaryna salyq salýǵa qatysty: quny 75 mln teńgeden asatyn jeńil avtomobılder, quny 100 mln. teńgeden asatyn ushaqtar men ıahtalar boıynsha qunynyń 10%-y mólsherinde aktsız mólsherlemesi belgilengen. Al jyljymaıtyn múlik boıynsha: salyq salý obektileriniń jıyntyq quny 450 mln teńgeden asqan kezde múlik salyǵyn esepteý árbir salyq salý obektisi boıynsha 2% deńgeıinde mólsherlemeni qoldana otyryp júzege asyrylady.

Zańdy Parlament Senatynda qaraý barysynda senatorlar tıisti túzetýler engizdi. Osy oraıda bul túzetýler qujatty Májiliske qaıtarýǵa negiz boldy.

Májilis qabyldaǵan Kodekske mynadaı negizgi baǵyttar boıynsha ózgerister men tolyqtyrýlar engizý qajettigi týyndady:

- sharýa nemese fermer qojalyqtarynyń (ShFQ) kiristeri boıynsha jeke tabys salyǵyna (JTS) progressıvti salyq salýdy engizý;

- Qazaqstan qor bırjasy (budan ári – KASE) men «Astana» halyqaralyq qarjy ortalyǵynyń bırjasy arasyndaǵy tórelikti boldyrmaý maqsatynda KASE-de baǵaly qaǵazdardyń aınalysyna baılanysty azamattardyń tabystary boıynsha dıvıdendterdi JTS-tan bosatý boıynsha salyq jeńildigi usynyldy;

- tólem kartochkalaryna baılanysty operatsııalardy qosylǵan qun salyǵynan (QQS) bosatý boıynsha jeńildik kózdeledi. Qazaqstandyq bankterdiń klıentterine qyzmet kórsetý boıynsha halyqaralyq tólem júıelerimen qıyndyqtardy boldyrmaý jáne kartalarmen tólem jasaý kezinde tranzaktsııalar qunynyń qymbattaýyn boldyrmaý úshin qoldanystaǵy jeńildikti saqtaý qajet;

- sán-saltanat zattaryna salyq salý boıynsha jeke normalar belgilenedi. Jeke tulǵalar ǵana sán-saltanat zattaryna aktsız tóleýshiler bolady. Bul rette avtomobılder, kemeler jáne ushý apparattary sııaqty sán-saltanat zattaryna salyq salý olardyń ımporty kezinde ǵana emes, eger olardyń quny shekti somadan artyq bolsa (avtomobılder úshin – 75 mln teńgeden astam, kemeler men ushý apparattary úshin – 100 mln teńgeden astam), olardy el ishinde satý kezinde de salyq salynady;

– beırezıdentter úshin memlekettik baǵaly qaǵazdarmen (MBQ) jasalatyn aınalymǵa baılanysty kirister boıynsha qoldanystaǵy salyq jeńildikterin saqtaý usynyldy. MBQ naryǵyna sheteldik ınvestorlardy tartý ınvestorlyq bazany ártaraptandyrý jáne bıýdjet tapshylyǵyn turaqty qarjylandyrý úshin negizgi baǵyt bolady. Sondyqtan MBQ aınalymdarynan beırezıdentterdiń kiristerine salyq salýdy engizý kapıtaldyń ketýine ákelýi múmkin;

- salyq salý obektisine, salyq bazasyna, salyq tóleýshilerdiń (salyq agentteriniń) sanattaryn ulǵaıtýǵa, shegerimniń nemese jeńildikterdiń kúshin joıýǵa nemese azaıtýǵa qatysty Salyq kodeksine ózgerister aǵymdaǵy jyldyń 1 shildesinen keshiktirilmeı qabyldanatyn jáne olar qabyldanǵan jyldan keıingi jyldyń 1 qańtarynan keıin qoldanysqa engiziletin tolyqtyrý usynylǵan;

- múgedektigi bar adamdar sanalatyn jumyskerler sany keminde 10 adamdy quraıtyn kásiporyndarda taýarlardy, jumystardy, kórsetiletin qyzmetterdi ótkizý boıynsha aınalymdardy QQS-tan bosatatyn norma kózdeledi;

- otandyq merzimdi baspa basylymdaryn ótkizý boıynsha aınalymǵa 10% mólsherinde QQS mólsherlemesi belgilenedi;

- áleýmettik mańyzy bar azyq-túlik taýarlaryn ótkizý boıynsha aınalymdardy QQS salýdan bosatý jónindegi normany alyp tastaý usynyldy.

Al ilespe zańǵa myna usynystar engizildi: 

- Qazaqstan Respýblıkasynyń Áleýmettik kodeksine QR Salyq kodeksinde ózin-ózi jumyspen qamtyǵandar úshin jańa jeńildikti salyq rejıminiń engizilýine baılanysty ózin-ózi jumyspen qamtyǵandar rejıminde barlyq jeke tulǵalar jáne ınternet-platformalar arqyly jumys isteıtin jekelegen jeke kásipkerler úshin mindetti áleýmettik tólemderdi tóleý tetikterin retteýge qatysty ózgerister engizildi.

- QR Bıýdjet kodeksine «Astana» halyqaralyq qarjy ortalyǵynyń aýmaǵynda memlekettik baǵaly qaǵazdardyń aınalymyna zań júzinde tyıym salatyn ózgerister engizildi.

Eske salsaq, bıyl 30 sáýirde Májilis Salyq kodeksin qabyldady. 

Qujatty depýtattarǵa Premer-mınıstrdiń orynbasary – Ulttyq ekonomıka mınıstri Serik Jumanǵarın tanystyrǵan bolatyn.

Onyń sózinshe, QQS salynatyn aınalymnyń tómengi shegi 40 mln teńge bolýy múmkin. 

Buǵan deıin Qarjy vıtse-mınıstri Erjan Birjanov sán-saltanat salyǵy boıynsha Úkimet usynǵan meje saqtalǵanyn aıtty.

Jańa salyq kodeksiniń negizgi jańashyldyqtaryn myna jerden kórýge bolady.