Senat jańa loýkosterdi iske qosýǵa baǵyttalǵan túzetýlerdi qabyldady
NUR-SULTAN. QazAqparat - Parlament Senatynyń jalpy otyrysynda Indýstrııa jáne ınfraqurylymdyq damý mınıstri Roman Sklıar avıatsııa salasyndaǵy tehnıkalyq aspektilerimen baılanysty qyzmetter Avıatsııalyq ákimshilikke beriletinin aıtty, dep habarlaıdy QazAqparat tilshisi.
Aıta keteıik, Parlament Senatynda «Qazaqstan Respýblıkasynyń keıbir zańnamalyq aktilerine kólik máseleleri boıynsha ózgerister men tolyqtyrýlar engizý týraly» zań jobasy eki oqylymda qaralyp, qabyldandy.
«Azamattyq avıatsııa salasyna toqtalsaq, «100 naqty qadam» - Ult josparynyń 68-shi qadamyn iske asyrýda zań jobasy «Azamattyq avıatsııa salasyndaǵy ýákiletti uıym» jańa uǵymyn engizedi. Bul 100 paıyz memlekettiń qatysýymen «Qazaqstannyń avıatsııalyq ákimshiligi» aktsıonerlik qoǵamy degendi bildiredi», - dedi mınıstr.
Osy oraıda Azamattyq avıatsııa komıtetiniń ruqsat berý jáne baqylaý-qadaǵalaý ókilettikteriniń tehnıkalyq aspektilerimen baılanysty fýnktsııalarynyń bir bóligi Avıatsııalyq ákimshilikke beriledi. Al memlekettik saıasatty aıqyndaý, zańnan týyndaǵan normatıvtik-quqyqtyq aktilerdi qabyldaý, ákimshilik aıyppul salý jáne tarıftik retteý sııaqty negizgi fýnktsııalar Azamattyq avıatsııa komıtetinde qalady.
Belgili bolǵandaı, atalǵan qujatta tasymaldaýshylardyń joljúgi, bagajdyń salmaǵy men gabarıtterin ózdiginen anyqtaýǵa múmkindik berý arqyly bıýdjettik áýe kompanııany (loýkoster) iske qosýǵa baǵyttalǵan túzetýler qarastyrylady.
