Senat zeınetaqy júıesin jańǵyrtýǵa baǵyttalǵan zań jobasyn 16 mamyrda jalpy otyrysta talqylaıtyn boldy
ASTANA. 2 mamyr. QazAqparat - Búgin Parlament Senatynda «Qazaqstan Respýblıkasynda zeınetaqymen qamsyzdandyrý týraly» jáne «Qazaqstan Respýblıkasynyń keıbir zańnamalyq aktilerine zeınetaqymen qamsyzdandyrý máseleleri Qazaqstan Respýblıkasynyń keıbir zańnamalyq aktilerine zeınetaqymen qamsyzdandyrý máseleleri boıynsha ózgerister men tolyqtyrýlar engizý týraly» zań jobalarynyń tanystyrylymy bolyp ótti.
Eske salsaq, buǵan deıin Májiliste maquldanǵan zań jobasy negizinen Qazaqstandaǵy zeınetaqy júıesin jańǵyrtýdy kózdeıdi. Bul rette qujat boıynsha Biryńǵaı jınaqtaýshy zeınetaqy qoryn qurý qarastyrylady. Biryńǵaı jınaqtaýshy zeınetaqy qorynyń quryltaıshysy men aktsıoneri el Úkimeti bolsa, onyń zeınetaqy aktıvterin basqarýdy QR Ulttyq banki júzege asyrady. Budan bólek zań jobasynyń sheńberinde aýyr jáne qaýipti óndiris jaǵdaıynda jumys isteıtin adamdar úshin mindetti sanatqa eńbekaqy tóleý qorynan 5 paıyz mólsherinde erikti kásiptik zeınetaqy jarnalaryn aýdarý qarastyrylady.
Bul rette jumys berýshige júkteme kóbeımeıdi. Zań jobasyndaǵy basty jańalyqtardyń biri - áıelderdiń zeınetkerlik jasyn birizdendirý máselesi. Bul rette zań jobasynda qamtylǵandaı zeınetkerlik jasty kóterý 2014 jyldyń 1 qańtarynan bastap zeınetkerlik jasty jyl saıyn 6 aıǵa ulǵaıta otyryp, birtindep 10 jyldyń ishinde júzege asyrý kózdeledi. Jobaǵa sáıkes, elimizde áıelder 2023 jyldan bastap zeınetkerlikke 63 jasynan shyǵa bastaıtyn bolady.
«Qoǵamda osy zań jobasy, onyń ishinde áıelderdiń zeınet jasyn arttyrý máselesi óte ótkir talqylanyp kele jatyr. Senat bul qujatty birinshi oqylymda on altynshy mamyrda qaraýdy josparlap otyr. Zań sapaly bolýy úshin bundaı tanystyrylym asa qajet», - dedi jalpy otyrys barysynda Senat Tóraǵasy Qaırat Mámı.
