Senat zańdy tulǵalardy memlekettik tirkeý týraly qujatty Májiliske qaıtardy
ASTANA. 15 qarasha. QazAqparat -Búgin Parlament Senatynyń jalpy otyrysynda
«Qazaqstan Respýblıkasynyń keıbir zańnamalyq aktilerine zańdy tulǵalardy memlekettik tirkeý jáne fılıaldar men ókildikterdi eseptik tirkeý máseleleri boıynsha ózgerister men tolyqtyrýlar engizý týraly» zań jobasy talqylandy.
Qujatqa birqatar ózgerister engizilgendikten Senat zań jobasyn Májiliske qaıtardy. Atalǵan qujat Qazaqstannyń 2020 jylǵa deıingi kezeńge arnalǵan quqyqtyq saıasat tujyrymdamasyn iske asyrý maqsatynda ázirlengen. Osyǵan oraı zań jobasymen tirkeý rásimderin ońaılatý, sondaı-aq kommertsııalyq jáne kommertsııalyq emes uıymdardyń qyzmetine memlekettik organdardyń zańsyz aralasýyna tosqaýyldar qoıý jónindegi zańnamalyq normalar kózdeledi.
Atap aıtqanda, zańdy tulǵalardy memlekettik tirkeý, olardyń fılıaldaryn eseptik tirkeý merzimderi odan saıyn qysqartylyp, bul týraly kýáliktiń qaǵazdaǵy nysanyn elektrondyq anyqtamamen aýystyrý qarastyrylady. Shaǵyn kásipkerlik sýbektilerine jatatyn zańdy tulǵany memlekettik tirkeýdiń ruqsat berý tártibinen habarlama tártibine kóshirý belgilenedi. Internet jelisi arqyly tirkeýler engiziledi.
Qujatty talqylaý barysynda senatorlar birqatar ózgerister engizdi. Atap aıtqanda, joǵary palata depýtattary zańdy tulǵalardy memlekettik tirkeý týraly kýálikti anyqtamamen aýystyrý týraly usynys jasady. Budan bólek, birqatar redaktsııalyq naqtylaý sıpatynda túzetýler jasaldy.
