Senat zańdy maquldady: bala kútiminde otyrǵan jumyssyz ákelerge eńbek ótili esepteledi
ASTANA. KAZINFORM – Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine qaýipsiz eńbek jaǵdaılaryn jetildirý, jumyskerlerdiń eńbek quqyqtaryn qorǵaý jáne áleýmettik qamsyzdandyrý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, maquldandy.
Zań Parlament depýtattarynyń bastamashyldyǵymen ázirlengen. Qujattyń negizgi maqsaty – qyzmetkerlerdiń eńbek quqyqtaryn qorǵaý salasyndaǵy eldiń zańnamasyn jetildirý, eńbekti qorǵaýdy basqarý júıesiniń jáne azamattardyń áleýmettik qorǵalýynyń tıimdiligin arttyrý.
- Osy oraıda zań qoldanystaǵy Eńbek kodeksine, Áleýmettik kodekske, Halyq densaýlyǵy jáne densaýlyq saqtaý júıesi týraly kodekske, Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly, Ruqsattar jáne habarlamalar týraly, sondaı-aq Memlekettik satyp alý týraly Qazaqstan Respýblıkasynyń zańdaryna ózgerister men tolyqtyrýlar engizýdi kózdeıdi, - dedi senator Rýslan Rústemov.
Bul rette, Eńbek kodeksine:
- qyzmetkerlerge dıetalyq emdik jáne dıetalyq profılaktıkalyq taǵam ónimderin berý sharttary men normalaryn bekitý bóliginde eńbek jónindegi ýákiletti organnyń quzyretin keńeıtý;
- uıymdaǵy tıisti kásip, laýazym boıynsha eń joǵary jáne eń tómengi jalaqy mólsherleri arasyndaǵy jol beriletin araqatynasty ujymdyq shartta belgileý;
- eńbek qyzmetine baılanysty jazataıym oqıǵalar kezinde tólenetin járdemaqylar men ótemaqylardy qosa alǵanda, tólemder týraly erejelerdi ujymdyq shartqa engizý;
- óndiristik jazataıym oqıǵalar oryn alý jaǵdaıynda qyzmetkerdiń kinásiniń dárejesin anyqtaýda jazataıym oqıǵadan zardap shekken qyzmetkerdiń kinási 25 paıyzdan aspaýy kerektigin bekitý;
- eńbek qaýipsizdigi jáne eńbekti qorǵaý jónindegi mamannyń tikeleı uıymnyń birinshi basshysyna baǵynýyn belgileý engiziledi.
Sondaı-aq, eńbek zańnamasyn ereýilderdi ótkizýge qatysty jekelegen máseleler boıynsha mynadaı normalarmen tolyqtyrý:
- tatýlastyrý komıssııasynyń jumysyna deldaldy tartý jáne onyń jumysqa qatysý tártibin egjeı-tegjeıli retteý;
- ereýil kezeńinde qaýipti óndiristik obektilerde mindetti túrde qamtamasyz etilýge tıis qajetti jumystar men kórsetiletin qyzmetterdiń eń tómengi kólemin aıqyndaý;
- ereýil ótkizý kezeńinde qyzmeti toqtatylmaıtyn óndiris túrlerin naqtylaý kózdeledi.
- Sonymen qatar, QR Konstıtýtsııalyq Sotynyń normatıvtik qaýlysyn iske asyrý maqsatynda Áleýmettik kodekske jasyna baılanysty zeınetaqy tólemderin taǵaıyndaý kezinde jumys istemeıtin ákeniń jas balalarǵa kútim jasaǵan ýaqytyn eńbek ótiline esepteýge qatysty naqtylaýlar engiziledi. Zańdy qabyldaý nátıjesinde qyzmetkerlerdiń qaýipsiz eńbek jaǵdaılaryn jáne eńbek quqyqtaryn qorǵaý, azamattardyń áleýmettik jaǵdaıyn jaqsartý qamtamasyz etiledi, - dedi depýtat.
Aıta keteıik, Parlament Májilisi bul zańdy bıyl aqpan aıynda qabyldaǵan edi.
