Senat zań maquldady: «Al-Farabi», «Qoja Ahmet Yassaui», «Meıirim» ordenderi qosyldy
ASTANA. KAZINFORM – Búgin Senattyń jalpy otyrysynda «Qazaqstan Respýblıkasynyń memlekettik nagradalary týraly» Zańyna ózgerister men tolyqtyrý engizý týraly» Zań maquldandy.
- Memlekettik nagradalar júıesi – memlekettiń qundylyqtyq baǵdaryn aıqyndaıtyn, qoǵamǵa úlgi bolatyn eńbekti tanytatyn jáne azamattyq jaýapkershilik mádenıetin qalyptastyratyn mańyzdy ınstıtýt. Sondyqtan bul saladaǵy árbir ózgeris tek quqyqtyq sıpattaǵy túzetý ǵana emes, eldiń rýhanı-ıdeologııalyq basymdyqtaryn naqtylaıtyn mańyzdy saıası sheshim retinde qaralýǵa tıis. Osy zań Prezıdent tapsyrmasyn oryndaý maqsatynda ázirlendi. Onyń negizgi maqsaty – memlekettik nagradalar júıesin qazirgi qoǵamdyq suranystarǵa, ulttyq qundylyqtarǵa jáne memlekettiń uzaq merzimdi damý basymdyqtaryna beıimdeı otyryp, mazmundyq turǵydan jańǵyrtý. Zańdaǵy basty jańalyq – ordender tizbesiniń jańa mazmundaǵy nagradalarmen tolyqtyrylýy. Atap aıtqanda, «Al-Farabi», «Qoja Ahmet Yasaui» jáne «Meıirim» ordenderin engizý kózdelip otyr, - dedi senator Aıgúl Qapbarova.
«Al-Farabi» ordeni bilim men ǵylymda, mádenıet pen rýhanı ómir salalarynda Qazaqstan Respýblıkasyna sińirgen zor eńbegi jáne eleýli jetistikteri úshin beriledi. Bul – ıntellektýaldyq eńbekke, ǵylym men bilimge, mádenı damýǵa memleket tarapynan beriletin joǵary baǵanyń kórinisi.
«Qoja Ahmet Yassaui» ordeni Qazaqstan Respýblıkasynyń damýyna erekshe eńbek sińirgen otandyq jáne sheteldik ǵalymdardy, memleket jáne qoǵam qaıratkerlerin, sondaı-aq memlekettilikti nyǵaıtýǵa, qoǵamdyq-saıası, áleýmettik, aǵartýshylyq, mádenı jáne gýmanıtarlyq salalardy damytýǵa úles qosqan azamattardy nagradtaýǵa arnalǵan. Bul orden elimizdiń tarıhı-rýhanı sabaqtastyǵyn, túrki órkenıeti keńistigindegi mádenı jáne gýmanıtarlyq baılanystardyń mánin aıqyndaıdy.
«Meıirim» ordeni joǵary áleýmettik jaýapkershilik tanytqan, qaıyrymdylyq qyzmetke, onyń ishinde metsenattyq nemese fılantropııalyq qyzmetke qomaqty úles qosqan azamattardy nagradtaýǵa múmkindik beredi. Bul bastama qoǵamdaǵy janashyrlyq, izgilik jáne ortaq jaýapkershilik qundylyqtaryn ınstıtýtsıonaldyq deńgeıde qoldaýǵa baǵyttalǵan.
- Sonymen birge zańda erekshe jaǵdaılarda aıryqsha kózge túskeni úshin Memleket basshysynyń sheshimimen nagradtaýdy belgilengen merzimderdi eskermeı júrgizý múmkindigi kózdelgen. Bul norma memlekettik nagradalar júıesiniń ıkemdiligin arttyryp, erekshe eńbekti der kezinde baǵalaýǵa jol ashady. Budan bólek, birqatar bapqa redaktsııalyq naqtylaýlar engizilip, qoldanystaǵy quqyqtyq olqylyqtar joıylady. Zań múddeli memlekettik organdardyń, sarapshylar qaýymdastyǵynyń usynystary jáne quqyq qoldaný tájirıbesi eskerile otyryp ázirlengen. Jalpy alǵanda, usynylyp otyrǵan túzetýler memlekettik nagradalar júıesin mazmundyq jaǵynan kúsheıtedi. Olar qoǵamǵa ǵylym men bilimniń, rýhanııat pen mádenıettiń, meıirim men áleýmettik jaýapkershiliktiń memlekettik deńgeıdegi qundylyqtar ekenin naqty kórsetedi, - dedi depýtat.
Buǵan deıin Qazaqstanda úsh jańa orden paıda bolatynyn jazǵan edik.
