Senat volonterlik pen qaıyrymdylyqqa qatysty qujatty qabyldady

NUR-SULTAN. QazAqparat – Senattyń jalpy otyrysynda «Qazaqstan Respýblıkasynyń keıbir zańnamalyq aktilerine volonterlik qyzmet, qaıyrymdylyq, memlekettik áleýmettik tapsyrys, strategııalyq áriptestikti iske asyrýǵa arnalǵan memlekettik tapsyrys, úkimettik emes uıymdarǵa arnalǵan granttar men syılyqaqylar, dárilik qamtamasyz etý jáne áleýmettik qamsyzdandyrý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaıdy QazAqparat tilshisi.

Zań jobasy Qazaqstan Respýblıkasy Úkimetiniń 2021 jylǵa arnalǵan zań jobalaý jumystarynyń josparyna sáıkes ázirlendi.

Qujatta 5 kodeks pen 14 zańǵa ózgerister men tolyqtyrýlar engizý kózdeledi.

Bul zańda ulttyq zańnamany úılestirýge jáne birizdendirýge, sondaı-aq volonterlik jáne qaıyrymdylyq qyzmetti jetildirýge baǵyttalǵan ózge de túzetýler eskerilgen.

Qujat volonterlik pen qaıyrymdylyqty damytýdy yntalandyrýǵa, memleket pen azamattyq sektordyń ózara is-qımyl júıesin jetildirýge, sondaı-aq dári-dármekpen qamtamasyz etýge jáne áleýmettik qamsyzdandyrýǵa baılanysty máselelerdi sheshýge yqpal etetin bolady.

Bul jóninde pikir bildirgen Senat tóraǵasy Máýlen Áshimbaev zań birqatar qoǵamdyq qatynasty retteıtin zańnamany odan ári jetildiretinin aıtty.

«Osy zań arqyly azamattardyń qaıyrymdylyq pen volonterlikke júıeli negizde qatysýyn yntalandyrý kózdelgen. Sondaı-aq bul qujat osyndaı áleýmettik paıdaly qyzmetpen aınalysý mádenıetin damytý úshin qolaıly quqyqtyq orta qalyptastyrady. Zańda granttyq qarjylandyrý protsesiniń ashyqtyǵyn, úkimettik emes uıymdardyń áleýetin jáne olardyń turaqty damýyn arttyrýǵa arnalǵan normalar bar. Sonymen qatar halyqqa dárilik zattar men medıtsınalyq qyzmetterdiń qoljetimdiligin qamtamasyz etetin quqyqtyq sheshimder belgilengen. Aldaǵy ýaqytta bul Zań elimizde qaıyrymdylyq pen volonterlik qyzmetti odan ári damytýǵa oń septigin tıgizedi dep senemiz», – dedi Senat tóraǵasy.