Senat vıtse-spıkeri TúrkPA Bas hatshysyn qabyldady
ASTANA. QazAqparat - Búgin Parlament Senaty Tóraǵasynyń orynbasary Asqar Beısenbaev Túrkitildes memleketter Parlamenttik Assambleıasynyń Bas hatshysy Jandos Asanovpen kezdesti. Bul týraly Senattyń baspasóz qyzmetinen habarlady.
Taraptar áńgime barysynda 11-13 maýsym kúnderi Baký qalasynda ótkizý josparlanǵan TúrkPA-nyń V jalpy sessııasyna ázirlik máselelerin, sondaı-aq Assambleıanyń turaqty komıssııalary men basqa da jumys organdarynyń qyzmet barysyn talqylady.
Sóz arasynda senator Asqar Beısenbaev túrkitildes elder arasyndaǵy yntymaqtastyqta Parlamenttik Assambleıanyń mańyzdy ról atqaratynyn atap ótti. Sonymen qatar ol uıymǵa múshe elder arasyndaǵy ekijaqty jáne kópjaqty turpattaǵy yntymaqtastyqtyń quqyqtyq aıasyn jetildirýge yqpal etetin TúrkPA-nyń saraptamalyq áleýetin jınaqtaýǵa qazaqstandyq taraptyń múddeli ekenin jetkizdi.
