Senat V.Jumaqanovtyń kandıdatýrasyn UQK tóraǵasy laýazymyna taǵaıyndaýǵa kelisti
«Konstıtýtsııalyq normalarǵa sáıkes UQK tóraǵasynyń taǵaıyndalýyna kelisim berý Senattyń erekshe qaraýyna jatady. Kelisim aldyn ala nemese sońyra beriledi», - degen Senat Tóraǵasy Qasym-Jomart Toqaev Elbasy N.Nazarbaevtyń usynysyn jarııa etý úshin sózdi QR Prezıdenti Ákimshiliginiń basshysy Nurlan Nyǵmatýlınge berdi.
Ol óz kezeginde ótken jumada Memleket basshysynyń Jarlyǵymen Nurtaı Ábiqaevtyń Ulttyq qaýipsizdik qyzmetiniń tóraǵasy laýazymynan bosatylyp, Senat depýtaty bolyp taǵaıyndalǵanyn eske salyp ótti. Sonymen qatar ol Konstıtýtsııa talaptaryna sáıkes Prezıdenttiń Senatqa UQK tóraǵasyn taǵaıyndaýǵa kelisim berý úshin usynysyn oqyp berdi.
«QR Parlamentiniń Senaty QR Konstıtýtsııasynyń 44-shi babynyń 4 tarmaqshasyna, 55-shi babynyń 2-shi tarmaqshasyna sáıkes Vladımır Zeınollauly Jumaqanovty QR UQK tóraǵasy qyzmetine taǵaıyndaýǵa kelisim berýlerińizdi suraımyn», - delingen QR Prezıdentiniń usynysynda.
Osydan keıin Senat depýtattary usynysqa ashyq daýys berip, biraýyzdan qoldaý kórsetti.
Aıta keteıik, 25 jeltoqsan kúni Elbasy Nursultan Nazarbaev Ulttyq qaýipsizdik komıtetinde onyń tóraǵasy Nurtaı Ábiqaevty zeınet jasyna jetýine jáne basqa jumysqa aýysýyna baılanysty laýazymynan bosatý týraly sheshim qabyldaǵanyn jarııa etken bolatyn. Sondaı-aq Qazaqstan Prezıdenti basshylyq quramǵa komıtettiń jańa tóraǵasy Vladımır Jumaqanovtyń kandıdatýrasyn tanystyrǵan edi.
Vladımır Zeınollauly Jumaqanov jańa laýazymǵa taǵaıyndalǵanǵa deıin Qazaqstan Respýblıkasy Ulttyq qaýipsizdik komıteti tóraǵasynyń birinshi orynbasary qyzmetinde bolǵan.
Ol 1955 jyly 7 qarashada RKFSR-dyń Sverdlov oblysy Garın aýdanynyń Dýlkovo aýylynda týǵan. S.Kırov atyndaǵy Qazaq memlekettik ýnıversıtetin; F.Dzerjınskıı atyndaǵy KSRO MQK joǵary Qyzyl Týly mektebin bitirgen.
1977 jyldan - S.M. Kırov atyndaǵy Qazaq memlekettik ýnıversıtetiniń ǵylymı qyzmetkeri. 1982 jyldan - qaýipsizdik organdarynda - QR UQK Departamentinde bólim bastyǵynyń orynbasary, bólim bastyǵy, basqarma bastyǵy, Departament bastyǵynyń orynbasary, QR UQK tóraǵasynyń keńesshisi. 2001 jyldan - QR UQK Lańkestikke qarsy kúres departamentiniń bastyǵy. 2010 jyldyń qyrkúıek aıynan beri - QR Ulttyq qaýipsizdik komıteti tóraǵasynyń birinshi orynbasary.
II dárejeli «Aıbyn», II dárejeli «Dańq» ordenderimen; 8 medalmen marapattalǵan. QR UQK Qurmetti qyzmetkeri. Ulttyq qaýipsizdik komıtetiniń general-leıtenanty.
