Senat: Úshinshi elderge qatysty arnaıy qorǵaý, dempıngke qarsy jáne ótemaqy sharalaryn qoldaný máseleleri qaraldy
ASTANA. QazAqparat - 4 mamyrda Parlament Senaty Ekonomıkalyq saıasat, ınnovatsııalyq damý jáne kásipkerlik komıteti «Úshinshi elderge qatysty arnaıy qorǵaý, dempıngke qarsy jáne ótemaqy sharalary týraly» zań jobasyn qarady.
Zań jobasy úshinshi elderge qatysty arnaıy qorǵaý, dempıngke qarsy jáne ótemaqy sharalarynyń qoldanylýyn retteý maqsatynda ázirlengen.
Zań jobasynda arnaıy qorǵaý, dempıngke qarsy jáne ótemaqy sharalaryn qoldaný salasyndaǵy biryńǵaı saýda saıasatyn qalyptastyrýǵa baǵyttalǵan Eýrazııalyq ekonomıkalyq odaq týraly shartqa sáıkes ulttyq zańnama normalary birizdendiriledi, sondaı-aq otandyq zańnama normalaryn Dúnıejúzilik saýda uıymynyń talaptaryna sáıkes keltirý kózdeledi, bul Qazaqstan Respýblıkasynyń osy uıymǵa qosylý protsesine yqpal etetin bolady.
Atap aıtqanda zań jobasynda mynalar kózdeledi:
arnaıy qorǵaý, dempıngke qarsy jáne ótemaqy sharalaryn qoldanýdyń jalpy qaǵıdattary;
arnaıy qorǵaý, dempıngke qarsy jáne ótemaqy sharalaryn qoldaný aldyndaǵy tergep-tekserý júrgizýge ótinishter berý sharttaryn ózgertý;
Eýrazııalyq ekonomıkalyq komıssııanyń qurylymynda tergep-tekserý júrgizetin organnyń tergep-tekserý júrgizý tártibi;
DSU kelisimderine sáıkes tergep-tekserý júrgizý rásimin reglamentteý;
EEK-tiń arnaıy qorǵaý, dempıngke qarsy jáne ótemaqy sharalaryn engizý týraly sheshimder qabyldaýy;
Qazaqstan Respýblıkasynyń ýákiletti organdary men EEK-tiń tergep-tekserý júrgizetin organy arasyndaǵy ózara is-qımyl.
Zań jobasyn qabyldaý saýda sharalaryn qoldaný salasyndaǵy normatıvtik quqyqtyq retteýdiń qazirgi bar olqylyqtaryn joıý arqyly ishki naryqty taýarlardyń ekonomıkaǵa zalal keltiretin ósken ımportynan qorǵaý úshin jaǵdaı jasaýǵa múmkindik beredi.
Komıtet otyrysynda «Qazaqstan Respýblıkasynyń keıbir zańnamalyq aktilerine úshinshi elderge qatysty arnaıy qorǵaý, dempıngke qarsy jáne ótemaqy sharalaryn qoldaný máseleleri boıynsha ózgerister men tolyqtyrýlar engizý týraly» zań jobasy birinshi oqylymda qaraldy.
Quqyqtyq olqylyqtardy joıý maqsatynda zań jobasymen Qazaqstan Respýblıkasynyń kodeksterine jáne zańdaryna «Úshinshi elderge qatysty arnaıy qorǵaý, dempıngke qarsy jáne ótemaqy sharalary týraly» Zań jobasymen kózdeletin ózgerister men tolyqtyrýlar engizý arqyly Eýrazııalyq ekonomıkalyq komıssııamen ózara is-qımyl jasaýǵa ýákiletti memlekettik organdardyń, basqa memlekettik organdardan alynǵan ulttyq organdardan joǵary turatyn organdarmen jáne halyqaralyq uıymdarmen qupııa aqparatpen almasý/ony berý máselelerin retteý usynylady.
Zań jobasyn qabyldaý ulttyq zańnama normalaryn Eýrazııalyq ekonomıkalyq odaq týraly Sharttyń sheńberindegi sharttyq-quqyqtyq bazany qalyptastyratyn, qol qoıylǵan jáne ratıfıkatsııalanǵan halyqaralyq kelisimdermen sáıkestendirýge múmkindik beredi.
Zań jobalary Palatanyń qaraýyna jiberildi.
