Senat turǵyn úı salasyn retteıtin ilespe zańdy Májiliske qaıtardy

ASTANA. KAZINFORM — Senat depýtattary zańnamany «Turǵyn úı-kommýnaldyq sharýashylyq, kásipkerlik jáne eksporttyq-kredıttik agenttiktiń qyzmeti máseleleri boıynsha ózgerister men tolyqtyrýlar engizý týraly» zańmen, jańa «Salyq» kodeksimen, «Ákimshilik quqyq buzý týraly kodekske turǵyn úı-kommýnaldyq sharýashylyq máseleleri boıynsha ózgerister men tolyqtyrýlar engizý týraly» zańmen sáıkestendirýge arnalǵan úsh zańdy eki oqylymda qarap, bir qujatty Májiliske keri qaıtardy.

— Senattyń turaqty komıtetteri «Qazaqstan Respýblıkasynyń keıbir zańnamalyq aktilerine turǵyn úı-kommýnaldyq sharýashylyq, kásipkerlik jáne eksporttyq-kredıttik agenttiktiń qyzmeti máseleleri boıynsha ózgerister men tolyqtyrýlar engizý týraly» jáne Qazaqstan Respýblıkasynyń Ákimshilik quqyq buzýshylyq týraly kodeksine turǵyn úı-kommýnaldyq sharýashylyq máseleleri boıynsha ózgerister men tolyqtyrýlar engizý týraly zańdarǵa qatysty eskertýler men usynystaryn bergen joq. Osyǵan oraı, Qazaqstan Respýblıkasy Konstıtýtsııasynyń 61-babynyń 4-tarmaǵyna sáıkes, Ekonomıkalyq saıasat, ınnovatsııalyq damý jáne kásipkerlik komıteti joǵaryda atalǵan 2 zańdy maquldaýdy usynady, — dedi Serik Shaıdarov.

Ol turǵyn úı zańnamasyn Salyq kodeksimen sáıkestendirýge arnalǵan ilespe zańǵa qosymsha túzetýler engizý qajettigin aıtty.

— «Salyq kodeksine jáne ony qoldanysqa engizý máseleleri boıynsha Qazaqstan Respýblıkasynyń zańdaryna ózgerister men tolyqtyrýlar engizý týraly» Qazaqstan Respýblıkasynyń Zańyn Senat otyrysynyń qaraýyna engizedi jáne Qazaqstan Respýblıkasy Konstıtýtsııasy 61-babynyń 4-tarmaǵyna sáıkes zańnyń jekelegen baptaryn maquldamaýdy jáne kórsetilgen baptardyń jańa redaktsııasyn usyna otyryp, ony Májiliske qaıtarýdy usynady, — dedi depýtat.

Aıta keteıik, búgin Senat jańa Salyq kodeksin Májiliske qaıtardy.