Senat Ulttyq bank tóraǵasy qyzmetine Danııar Aqyshevty taǵaıyndaý týraly Elbasynyń usynysyna kelisimin berdi
ASTANA. QazAqparat - Búgin Senattyń jalpy otyrysynda QR Prezıdenti N. Nazarbaev QR Ulttyq banki tóraǵasynyń qyzmetine Danııar Aqyshevtyń kandıdatýrasyna kelisim berýdi suraǵan bolatyn. Buǵan Palata depýtattary óz kelisimin berdi. Eske sala keteıik, QR Konstıtýtsııasyna sáıkes, QR Prezıdenti QR Ulttyq banki tóraǵasynyń kandıdatýrasyn usynyp, Senat buǵan kelisimin berýi tıis.
«Búgin Qazaqstan Respýblıkasynyń prezıdenti óziniń Jarlyǵymen QR Ulttyq bankiniń tóraǵasy Qaırat Nematuly Kelimbetovty qyzmetinen bosatty. Konstıtýtsııa normalaryna sáıkes, QR Ulttyq banki tóraǵasynyń qyzmetine kelisimin alý úshin Prezıdenttiń usynysy shyǵarylyp otyr», - dedi osy másele boıynsha Parlament Senatynda sóz sóılegen QR Prezıdenti Ákimshiliginiń tóraǵasy Nurlan Nyǵmatýlın. Bul rette Prezıdent Ákimshiliginiń basshysy Elbasy UB tóraǵasyna kandıdat retinde Aqyshev Danııar Talǵatulyn usynǵanyn jetkizdi. Talqylaýdan soń senatorlar Elbasy usynysyn biraýyzdan qoldady.
Eske sala keteıik, QR Prezıdentiniń baspasóz qyzmeti taratqan habarlamaǵa sáıkes, Elbasy óz usynysyn Senatqa bildirip: «Ol Qazaq basqarý akademııasyn bitirip shyqqan. Ulttyq bankte 18 jyl qyzmet etse, sonyń 7 jylynda tóraǵa orynbasary bolyp jumys istedi. Qazirgi ýaqytta Prezıdent Ákimshiliginde qyzmet etip keledi. Elimizdegi ekonomıkalyq máselelerdi de jan-jaqty zerttegen, eldiń jaǵdaıyn da biledi», - degen bolatyn.
