Senat Ulttyq ál-aýqat Qory týraly zańdy qabyldady
ASTANA. 11 qańtar. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Ulttyq ál-aýqat Qory týraly» QR Zańyn qabyldady.
Atalǵan zańdy ázirleýdegi negizgi maqsat daǵdarystan keıingi kezeń jaǵdaıynda Qor qyzmetin josparlaý jáne iske asyrýdy, derbestilikti, ıkemdilikti jáne jedeldikti, Memlekettiń Qor jumysyna aralasýyn shekteýdi ózgertý bolyp tabylady.
Bul rette Ulttyq Qormen onyń enshiles kompanııalarynyń tabystylyǵyn, qarjylyq ornyqtylyǵyn qamtamasyz etý úshin ózara is-qımyldyń naqty qaǵıdalaryn aıqyndaýdy kózdeıtin Qor qyzmetiniń negizgi baǵyttaryn ózgertýler de qarastyrylady. Osyǵan baılanysty Qor tobyna eń úzdik korporatıvtik basqarýdyń qaǵıdattary engiziledi. Ulttyq Qorǵa jáne Qor tobynyń uıymdaryna ashyqtyq pen transfarenttik qaǵıdattary negizinde sharýashylyq júrgizý qyzmetiniń aǵymdaǵy máseleleri boıynsha sheshimderdi derbes qabyldaý múmkindigi beriledi, onyń qyzmetine memlekettik organdardyń shekten tys aralasýyn shekteý kózdeledi. Jalpy alǵanda qujat ózara is-qımyl tártibin jetildirýge jáne Úkimet pen Ulttyq Qor ókilettiginiń aıqynyraq anyqtamasyn qamtýǵa, strategııalyq josparlaý júıesiniń tıimdiligin arttyrýǵa baǵyttalady. Budan bólek Ulttyq Qorǵa bólinetin respýblıkalyq bıýdjettiń atqarylýyn baqylaý maqsatynda Qor men Esep komıteti arasynda ózara áreketesý mehanızmi bekitiledi.
«Atalǵan zań atqarýshy bılik tarmaǵy jáne jalǵyz ǵana aktsıoner retinde Úkimet fýnktsııalaryn naqty júıeleýdi qarastyrady. Osynyń ózi Qordaǵy basqarýdyń asa tıimdiligine septigin tıgizetin bolady. Sonymen birge Úkimette Qor qyzmetine tolyq baqylaý jasaý múmkindigi qalady»,-dedi «Samuryq Qazyna» AQ basqarma tóraǵasynyń orynbasary Qýandyq Bıshimbaev.
Qujatta Esep komıtetiniń ókilin Qordyń dırektorlar keńesi janyndaǵy Mamandandyrylǵan komıtetke qosýdy qarastyrady. Zańdy ázirleýshilerdiń pikirinshe, atalǵan shara Ulttyq Qormen onyń barlyq enshiles kompanııalarynyń memlekettik ǵana emes, kommertsııalyq qyzmetinen túsken tabystaryna Esep komıteti arqyly baqylaýdy qamtamasyz etedi. Mamandandyrylǵan komıtet quramyna memlekettik baqylaý men quqyq qorǵaý organdarynyń ókilderi de kiretin bolady.
Parlament qabyldaǵan zań Memleket basshysynyń qol qoıýyna jiberiledi.
