Senat UQShU qyzmetine qatysty zańdy maquldady
ASTANA. KAZINFORM — Senattyń jalpy otyrysynda «2010 jylǵy 10 jeltoqsandaǵy Ujymdyq qaýipsizdik týraly shart uıymy ujymdyq qaýipsizdik júıesiniń kúshteri men quraldary quralymdarynyń mártebesi týraly kelisimge ózgerister engizý týraly hattamany ratıfıkatsııalaý týraly» zań jáne oǵan ilespe qujat maquldandy.
Senat depýtaty Gennadıı Shıpovskıhtiń sózinshe, ózgeristerdiń negizgi maqsaty — quralymdardyń múshe memleketter aýmaǵynda ýaqytsha bolýyn qamtamasyz etý jáne tasymaldaý sharttaryn naqtylaý.
— Birinshiden, kelisimderdiń túsindirme apparaty keńeıtilip, «tranzıt», «áýeaılaqtyq-tehnıkalyq qamtamasyz etý», «aeronavıgatsııalyq qyzmet kórsetý» jáne «aeronavıgatsııalyq derekter» sekildi termındermen tolyqtyryldy. Ekinshiden, áskerı quralymdardy Qabyldaýshy taraptyń aýmaǵyna jiberýdiń sharttary egjeı-tegjeıli aıqyndaldy. Úshinshiden, shuǵyl den qoıý jaǵdaılary úshin áskerı tasymaldaýǵa ótinim berý merzimi úsh táýlikten bir táýlikke deıin qysqartyldy. Tórtinshiden, Ujymdyq Qaýipsizdik Keńesiniń sheshimimen júzege asyrylatyn tasymaldaýlar kezinde qabyldaýshy nemese tranzıttik Taraptar birqatar qyzmetti — áýe kemelerin qabyldaý men jóneltýdi, áýeaılaqtyq-tehnıkalyq qamtamasyz etýdi, turaq oryndaryn berýdi, kúzetti jáne aeronavıgatsııalyq qyzmet kórsetýdi — óteýsiz negizde atqarady. Alaıda, janarmaı, jaǵarmaı materıaldary, arnaýly suıyqtyqtar jáne gazben quıý máseleleri tıisti kelisimder men jekelegen ýaǵdalastyqtar boıynsha júrgiziledi. Hattamalardy ratıfıkatsııalaý Qazaqstan múddesine jáne Uıym sheńberindegi halyqaralyq mindettemege sáıkes keledi, — dedi senator.
Aıta keteıik, buǵan deıin Májilis UQShU qyzmetine qatysty zańdy qabyldaǵanyn jazǵanbyz.
