Senat UQShU hatshylyǵynyń kadr máselesine arnalǵan qujaty maquldandy
Búgin Senattyń jalpy otyrysynda «2002 jylǵy 7 qazandaǵy Ujymdyq qaýipsizdik týraly shart uıymynyń Jarǵysyna ózgerister engizý týraly tórtinshi hattamany ratıfıkatsııalaý týraly» Zańy maquldandy, dep habarlaıdy Kazinform.
Jarǵyǵa ózgerister engizý týraly tórtinshi hattamaǵa 2022 jylǵy 26 tamyzda qol qoıylǵan.
«Hattama Jarǵynyń 8-shi jáne 17-baptaryna tolyqtyrýlar engizýdi kózdeıdi. Birinshiden, Jarǵynyń 8-babyna Uıymǵa múshe memleketterge bıologııalyq qaýipsizdik salasyndaǵy ózara is-qımyldy keńeıtýge múmkindik beretin ózgerister engiziledi. Dúnıejúzilik densaýlyq saqtaý uıymynyń 2020 jyly COVID-19 koronavırýs pandemııasyn jarııalaýyna baılanysty Uıymǵa múshe memleketter bıologııalyq qaýipsizdik salasyndaǵy ózara is-qımyl máselelerin pysyqtaýdy bastady. Atap aıtqanda, uıym aıasynda bıologııalyq ári pandemııalyq qaterlerdiń aldyn alý jáne olarǵa qarsy is-qımyl salasyndaǵy qyzmet pen yntymaqtastyqty úılestirý maqsatynda Uıymǵa múshe memleketterdiń bıologııalyq qaýipsizdik máseleleri jónindegi ýákiletti organdarynyń Úılestirý keńesi quryldy», - dedi senator Darhan Qydyráli.
Osyǵan baılanysty Uıym Jarǵysyn bıologııalyq qaýipsizdik máseleleri boıynsha yntymaqtastyqty qosý týraly normamen tolyqtyrý eskerilgen.
Budan basqa, Uıym Jarǵysynyń 17-babyna Uıymnyń syrtqy ister mınıstrleri Keńesiniń usynymyna sáıkes jáne Uıymnyń ujymdyq qaýipsizdik Keńesiniń sheshimi boıynsha Uıymnyń Bas hatshysynyń ókilettigin merziminen buryn toqtatýǵa múmkindik beretin tolyqtyrý engiziledi. Uıymnyń normatıvtik quqyqtyq bazasynda Bas hatshyny merziminen buryn bosatý tártibi rettelmegenin atap ótken jón. Bul jaǵdaı 2018 jyly Bas hatshy ókilettigi merziminen buryn toqtatylǵanda aıqyn ańǵaryldy. Halyqaralyq uıymdardyń tájirıbesinde birqatar sebepke baılanysty bas ákimshilik laýazymdy adam óz ornyn merziminen buryn bosatatyn jaǵdaılar týyndaıdy. Máselen, jeke jaǵdaılarǵa baılanysty óz qalaýy boıynsha bosaıdy nemese ony jiberýshi memleket keri qaıtaryp alady.
«2024 jyldyń 1 qańtarynan bastap Uıymǵa tóraǵalyq etý kezegi Qazaqstanǵa ótedi. Taıaýda Mınskide ótken Uıymnyń Ujymdyq qaýipsizdik keńesiniń sessııasynda Memleket basshysy Qasym-Jomart Toqaev Qazaqstan tóraǵalyǵy kezinde Uıym qyzmeti boıynsha basym baǵyttardy aıqyndap berdi. Sondyqtan zańnyń qabyldanýy Uıymǵa múshe memleketterdiń ózara is-qımyl aıasyn keńeıtýge jáne máselelerdi jedel sheshýge múmkindik beredi», - dedi depýtat.
