Senat UQShU elderiniń aqparattyq qaýipsizdigine qatysty qujatty qabyldady

ASTANA. QazAqparat - Parlament Senatynyń jalpy otyrysynda palata depýtattary «Ujymdyq qaýipsizdik týraly shart uıymyna múshe memleketterdiń aqparattyq qaýipsizdikti qamtamasyz etý salasyndaǵy yntymaqtastyǵy týraly kelisimdi ratıfıkatsııalaý týraly» Zańyn qabyldady, dep habarlaıdy QazAqparat tilshisi.

Kelisimge UQShU-ǵa múshe memleketterdiń basshylary 2017 jylǵy qarashada Mınsk qalasynda qol qoıdy.

Aqparattyq qaýipsizdikti qamtamasyz etý salasyndaǵy senimdi nyǵaıtý sharalaryn damyta otyryp, taraptar ǵylymı-zertteý jumystarynyń nátıjelerimen almasýdy júzege asyrady.

«Qujat Qazaqstannyń halyqaralyq mindetterine qaıshy kelmeıdi. Kelisim halyqaralyq aqparattyq qaýipsizdikti nyǵaıtady, shabýyldarǵa birlesip den qoıýdyń tájirıbelik tetikterin qalyptastyrady, uıym keńistiginde senim sharalaryn damytady jáne nyǵaıtady. Sonymen qatar, aqparattyq qaýipsizdikti qamtamasyz etýdiń tehnologııalyq negizderin pysyqtaýǵa baǵyttalǵan», - dedi QR Qorǵanys jáne aeroǵarysh ónerkásibi vıtse-mınıstri Amanııaz Erjanov.

Atap aıtqanda, uıym elderiniń memlekettik organdary kompıýterlik shabýyldardyń shyǵý kózderin tabý úshin birlesken is-sharalardy ótkizýge yqpal etedi. Ekinshiden, asa mańyzdy qurylymdardy qorǵaý máselelerinde ózara is-qımyl jasaýǵa múmkindik beriledi.

«Zań jobasyn qabyldaý memlekettik bıýdjetten qarjyny bólýdi qajet etpeıdi jáne teris ekonomıkalyq ári quqyqtyq saldarǵa ákelip soqpaıdy», - dedi vıtse-mınıstr.