Senat tutynýshylardyń quqyn qorǵaýǵa arnalǵan jobany Májiliske qaıtardy
A. Qańtardyń 15-i. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Tutynýshylardyń quqyqtaryn qorǵaý týraly» zań jobasyn talqylap, qujatty Májiliske qaıtardy,
dep habarlaıdy QazAqparat.
Qazirgi kúni qoldanystaǵy tutynýshylar quqyqtaryn qorǵaý salasyndaǵy qatynastardy retteıtin zańnamalyq akti 1991 jylǵy qańtardyń 5-inde qabyldanǵan «Tutynýshylardyń pravolaryn qorǵaý týraly» Qazaq KSR zańy bolyp tabylady. Osyǵan baılanysty atalǵan zań jobasy jańa redaktsııada jasalyp otyr. Qujattyń maqsaty osy saladaǵy zańnamany el ekonomıkasynyń qazirgi talaptaryna jáne qoldanystaǵy basqa da zańnamalarǵa sáıkes keltirý bolyp tabylady. «Qoldanystaǵy zań - alǵashqy naryqtyq zańdardyń biri. Alaıda, zań qabyldanǵannan beri 19 jyl ýaqyt ótti. Osy merzimde elimizdiń áleýmettik-ekonomıkalyq jaǵdaıynda kóptegen ózgerister oryn alǵany belgili. Sonymen birge, qashanda tutynýshylardyń quqyqtaryn qorǵaý problemasy ózekti másele bolyp tabylady. Óıtkeni, elimizde bul sanatty qorǵaý júıesi kúni búginge deıin qurylmaǵan. Kúndelikti ómirde - satýshy, daıyndaýshy, oryndaýshy tarapynan tutynýshylardyń quqyqtaryn óreskel buzýshylyqtar da oryn alyp jatady. Mysaly, tutynýshylar sapasyz taýardy satyp alyp, ony aıyrbastaı almaıtyn jaǵdaıǵa qalatyny da ras. Keıbir taýarlardyń adam ómiri men densaýlyǵyna qaýiptiligi joǵary. Sondyqtan da zań jobasy osyndaı olqylyqtardy joıý maqsatynda jańa redaktsııada ázirlendi», dedi senator Nurlyǵaıym Joldasbaeva.
Onyń aıtýynsha, Senat Parlament Májilisi maquldaǵan zań jobasyna birqatar túzetýler engizgen. Atap aıtqanda, «tutynýshy» uǵymy naqtylanyp, tutynýshylardyń quqyǵyn kózdeıtin normalar tolyqtyryla túsken. Osyǵan oraı, zań jobasy Parlament Májilisine qaıtarylyp otyr.
