Senat Túrki ınvestıtsııalyq qoryn qurý týraly zańdy maquldady
Búgin Senattyń jalpy otyrysynda «Túrki ınvestıtsııalyq qoryn qurý týraly kelisimdi ratıfıkatsııalaý týraly» Zańy maquldandy, dep habarlaıdy QazAqparat tilshisi.
Qor qurý týraly kelisimge 2023 jylǵy 16 naýryzda Túrki memleketteriniń uıymyna (TMU) múshe memleketter basshylarynyń sammıti aıasynda qol qoıyldy. «Túrki ınvestıtsııalyq qoryn qurý týraly kelisimdi ratıfıkatsııalaý týraly» Zań túrki áleminiń ekonomıkalyq ıntegratsııasynyń alǵashqy birlesken qarjy ınstıtýtyn qurý úshin ázirlendi.
TMU-ǵa 5 múshe memleket: Qazaqstan Respýblıkasy, Ázerbaıjan Respýblıkasy, Túrkııa Respýblıkasy, Ózbekstan Respýblıkasy jáne Qyrǵyz Respýblıkasy Qor quryltaıshylary retinde tirkeldi. Qor qurylymy Prezıdentten, Basqarýshylar keńesinen, Dırektorlar keńesinen, Bas dırektordan jáne qyzmetkerlerden turady.
Qordyń árbir múshesiniń daýys berý quqyǵy teń. Qordyń shtab-páteri Ystanbul qalasynda ornalasqan. Qor mynadaı fýnktsııalardy oryndaıdy: jobalardy, atap aıtqanda shaǵyn ári orta kásiporyndardyń jobalaryn qarjylandyrý, tsıfrlyq ınfraqurylym jasaýdy jáne ony jańǵyrtýdy qoldaý, ónerkásip óndirisin, kólikti, aýyl sharýashylyǵyn, týrızmdi, sondaı-aq «jasyl ekonomıkany» qosa alǵanda, ózara múddeli salalarda damý jobalaryn qoldaý.
Qordyń jarǵylyq kapıtaly 500 mln dollar kóleminde bolmaq. Senattyń Ekonomıkalyq saıasat, ınnovatsııalyq damý jáne kásipkerlik komıtetiniń málimetine qaraǵanda, qordyń jarǵylyq kapıtaly jalpy nomınaldy quny 350 mln AQSh dollaryn quraıtyn tólengen aktsııalarǵa, sondaı-aq nomınaldy quny 150 mln AQSh dollaryn quraıtyn tartylatyn aktsııalarǵa bólinedi. Qorǵa árbir múshe memleketke 70 mln AQSh dollaryn quraıtyn tólengen aktsııadan keledi.
Kelisimdi ratıfıkatsııalaý Qazaqstan Respýblıkasyna ekonomıkanyń basym sektorlaryndaǵy, ásirese shaǵyn jáne orta kásipkerlikti damytý jobalaryn qarjylandyrýdy alýǵa, sondaı-aq TMU óńiri aıasynda saýda-ekonomıkalyq yntymaqtastyqty nyǵaıtýǵa múmkindik beredi.
«Túrki ınvestıtsııalyq qoryn qurý Qazaqstan úshin ońtaıly múmkindikter beredi. Birinshiden, kóliktik-logıstıkalyq áleýetti iske asyrý maqsatynda, qolaıly geografııalyq ornalasqan jerdi paıdalana otyryp, Túrki memleketteri uıymyndaǵy áriptestermen odan ári ekonomıkalyq ıntegratsııany nyǵaıtý eskerilgen. Ekinshiden, úzdik ekonomıkalarmen birlesken jobalardy iske asyrý aıasynda ınnovatsııalar jáne tehnologııalarmen almasýǵa múmkindik bolady», - dedi senator Álibek Náýtıev.
